सांगोला – किराणा माल आणण्यासाठी गावात निघालेल्या तरुण शेतकऱ्याच्या अंगावर वीज पडून भाजल्याने जागीच ठार झाला तर एक तरुण जख्मीं झाला. ही घटना शनिवारी दुपारी ३:३० च्या सुमारास मानेगाव ते डोंगरगाव ता सांगोला जाणाऱ्या रोडवरील रस्त्यालगत घडली.दिनेश शंकर चव्हाण -२५ असे मृत शेतकरी तरुणाचे नाव असून , जख्मीं तरुणाचे नाव समजून आले नाही.याबाबत ,मृत दिनेशचे वडील शंकर गुंडाजी चव्हाण रा मानेगाव ता सांगोला यांनी खबर दिली असून पोलिसांनी अकस्मात मृत्यूची नोंद केली आहे.
मृत , दिनेशची आई वंदना यांनी मुलगा दिनेशला किराणा दुकानातून सामान आणण्यासाठी शनिवारी दुपारी ३:३० च्या सुमारास मानेगावात पाठवले होते. तो मानेगाव ते डोंगरगाव रोडने गावात येत असताना वाटेत बाळासाहेब बाबर यांच्या घराच्या बाजूला रस्त्यावर अचानक दिनेशच्या अंगावर वीज पडून गंभीर जख्मीं झाला तर त्याच्या पाठीमागे दुचाकी वरुन येणा-या तरुणाला उजव्या अंगाला, पायाला भाजून तोही जख्मीं झाला. दरम्यान सुशांत बाबर याने दिनेशच्या अंगावर वीज पडल्याचे त्यांच्या घरी सांगितले दरम्यान वडील शंकर चव्हाण यांनी घटनास्थळी येवून त्यास जख्मीं अवस्थेत सांगोला ग्रामीण रुग्णालयात दाखल केले असता डॉक्टरांनी तपासून तो उपचारापूर्वी मयत झाल्याचे सांगितले.
