पुण्यातील केतन अग्रवाल हत्या प्रकरणात तपासातून धक्कादायक माहिती समोर आली आहे. पोलिसांच्या आरोपपत्रानुसार, केतनला लोहगडावर नेण्यासाठी आरोपींनी ‘माही’ नावाचे बनावट इन्स्टाग्राम अकाउंट तयार केले होते. या अकाउंटवरून केतनशी संवाद साधून त्याला सिया हिच्या वाढदिवसाच्या सरप्राइजसाठी लोहगडावर येण्यास प्रवृत्त करण्यात आल्याचा पोलिसांचा दावा आहे.
१८ जून रोजी लोहगड किल्ल्यावर केतनचा मृत्यू झाला. पोलिसांच्या तपासानुसार, त्याला कड्यावरून ढकलण्यात आल्याचा आरोप सिया गोयल, चेतन चौधरी आणि रितेश हांगे यांच्यावर आहे. या प्रकरणात तिघांवरही कारवाई करण्यात आली आहे.
पोलिसांनी आरोपींचे मोबाईल आणि इलेक्ट्रॉनिक उपकरणे जप्त करून डिलीट केलेल्या चॅट्सचा शोध घेतला. तांत्रिक तपासात बनावट इन्स्टाग्राम अकाउंट आणि त्यावरील संभाषण पोलिसांना मिळाल्याचे सांगण्यात आले आहे. या डिजिटल पुराव्यांचा तपासात महत्त्वाचा आधार असल्याचे पोलिसांचे म्हणणे आहे.
या प्रकरणात पोलिसांनी न्यायालयात ५,०५३ पानी आरोपपत्र दाखल केले आहे. दरम्यान, केतनच्या वडिलांनी मुलाचे सिया सोबत लग्न ठरले होते आणि दोन्ही कुटुंबे लग्नाची तयारी करत होती, अशी माहिती दिली आहे.
