उत्तर प्रदेशातील आझमगड जिल्ह्यात पूजेदरम्यान झालेल्या वादातून भीषण हत्याकांड घडल्याची घटना समोर आली आहे. शंभूपूर गहजी गावात अरविंद सिंह नावाच्या व्यक्तीने घरात सुरू असलेल्या महामृत्यूंजय पूजेदरम्यान पत्नी आणि दोन पुरोहितांवर गोळीबार केल्याचा आरोप आहे. त्यानंतर त्याने आपल्या मुलांनाही खोलीत डांबून ठेवले. जवळपास सात ते आठ तास चाललेल्या पोलिसांच्या कारवाईनंतर अरविंदचा मृत्यू झाला. या घटनेत त्याचा मुलगाही मृत्युमुखी पडला.
मिळालेल्या माहितीनुसार, अरविंदची पत्नी बबीता सिंह यांनी त्यांच्या दिवंगत भावाच्या आत्म्याला शांती मिळावी यासाठी घरात महामृत्यूंजय पठणाचे आयोजन केले होते. यावेळी काही पुरोहित घरात उपस्थित होते. अरविंद घरी परतल्यानंतर त्याचा पुरोहितांशी वाद झाला. पोलिसांच्या प्राथमिक माहितीनुसार, त्याने पुरोहितांकडे आधार कार्ड मागितल्याने वाद वाढला.
वाद वाढल्यानंतर अरविंदने कथितपणे घरातील शस्त्र काढून पत्नी बबीता आणि दोन पुरोहितांवर गोळीबार केला. महेंद्र पाठक आणि अखिलेश मिश्रा अशी मृत पुरोहितांची नावे सांगण्यात आली आहेत. गोळीबारानंतर अरविंद आपल्या तीन मुलांसह घरातील एका खोलीत जाऊन बसला.
घटनेची माहिती मिळताच पोलिसांनी घराला वेढा घातला. अरविंदला शरण येण्यासाठी वारंवार आवाहन करण्यात आले. नातेवाईक आणि पोलिस अधिकाऱ्यांच्या माध्यमातून त्याच्याशी संवाद साधण्याचाही प्रयत्न करण्यात आला. मात्र, तो बाहेर येण्यास तयार नव्हता.
दीर्घकाळ चाललेल्या या ऑपरेशनदरम्यान पोलिसांनी स्टन ग्रेनेड आणि अश्रुधुराचा वापर करून घरात प्रवेश केला. पोलिसांच्या म्हणण्यानुसार, यावेळी अरविंदने पोलिसांवर गोळीबार केला. मुलांना सुरक्षित बाहेर काढण्याच्या प्रयत्नात पोलिसांनी प्रत्युत्तरादाखल गोळीबार केला. यात अरविंद जखमी झाला. त्याला आणि जखमी मुलाला रुग्णालयात नेण्यात आले; मात्र दोघांचाही मृत्यू झाला.
या घटनेत अरविंदची पत्नी, दोन पुरोहित, त्याचा मुलगा आणि स्वतः अरविंद अशा पाच जणांचा मृत्यू झाला आहे. त्याच्या दोन मुलींना पोलिसांनी सुरक्षित बाहेर काढले असून त्यांच्यावर उपचार सुरू असल्याचे वृत्त आहे. घटनेचा पुढील तपास पोलिसांकडून सुरू आहे.
