पान मसाला आणि गुटख्याच्या कथित अप्रत्यक्ष जाहिरातीप्रकरणी अभिनेता शाहरुख खान, अजय देवगण आणि टायगर श्रॉफ यांना महाराष्ट्र अन्न व औषध प्रशासनाने (FDA) कारणे दाखवा नोटीस बजावली होती. आता तिन्ही अभिनेत्यांनी FDA च्या नोटिशीला उत्तर दिल्याची माहिती समोर आली आहे.
महाराष्ट्र FDA चे आयुक्त तुकाराम मुंढे यांनी या प्रकरणातील पुढील कारवाईबाबत माहिती दिली. त्यांच्या माहितीनुसार, तीन अभिनेत्यांपैकी दोन जणांनी सुनावणी घेण्याची विनंती केली होती. या दोन्ही प्रकरणांतील सुनावणी पूर्ण झाली आहे. मात्र, कोणत्या दोन अभिनेत्यांच्या प्रकरणात सुनावणी झाली, हे स्पष्ट करण्यात आलेले नाही.
नेमकं प्रकरण काय?
FDA ने ऑगस्टमध्ये शाहरुख खान, अजय देवगण आणि टायगर श्रॉफ यांना एका पान मसाला ब्रँडशी संबंधित जाहिरातीप्रकरणी नोटीस बजावली होती. संबंधित जाहिरात ‘सरोगेट किंवा अप्रत्यक्ष जाहिरात’ म्हणून ग्राह्य धरता येते का, याबाबत FDA कडून प्रश्न उपस्थित करण्यात आले होते.
पान मसाला आणि तंबाखूजन्य उत्पादनांच्या जाहिरातींवर विविध कायदेशीर निर्बंध आहेत. त्यामुळे एखाद्या वेगळ्या उत्पादनाच्या नावाखाली प्रतिबंधित उत्पादनाचा अप्रत्यक्ष प्रचार केला जात आहे का, याची तपासणी FDA कडून केली जात आहे.
आता पुढे काय?
तिन्ही अभिनेत्यांकडून नोटिशीला उत्तर मिळाले असून दोन प्रकरणांमध्ये सुनावणीही पूर्ण झाली आहे. त्यामुळे आता FDA कडून या प्रकरणातील पुढील कायदेशीर आणि विभागीय प्रक्रिया केली जाणार आहे. अंतिम निर्णय झाल्यानंतरच या प्रकरणात पुढे कोणती कारवाई होणार, हे स्पष्ट होईल.
तुकाराम मुंढे यांनी यापूर्वी स्पष्ट केले होते की, या कारवाईचा उद्देश कोणत्याही अभिनेत्याला लक्ष्य करणे नसून जाहिरात करणाऱ्या व्यक्तीचीही जबाबदारी निश्चित करण्याशी संबंधित आहे.
