सांगोला (प्रतिनिधी)- डॉ.बाबासाहेब आंबेडकर यांच्या जयंतीच्या पार्श्वभूमीवर सांगोला तालुक्यातील वझरे येथील भीमसैनिक भिकू सुखदेव धांडोरे यांनी एक अनोखा आणि प्रेरणादायी उपक्रम हाती घेतला आहे. स्वतःच्या सायकलवर डॉ.बाबासाहेब आंबेडकर यांचा फोटो, माईकची व्यवस्था व बाबासाहेबांची गाणी लावून ते गावोगावी फिरत विचारप्रबोधन करत आहेत.
चोपडी, बलवडी, नाझरे, चिनके आदी गावांमध्ये फिरून धांडोरे हे नागरिकांपर्यंत बाबासाहेबांचे विचार पोहोचवत आहेत. कोणताही दिखावा किंवा प्रसिद्धीची अपेक्षा न ठेवता ते समाजजागृतीचे कार्य करत असल्याने त्यांच्या या उपक्रमाचे सर्व स्तरांतून कौतुक होत आहे.
डॉ.बाबासाहेब आंबेडकर यांचे विचार प्रत्येक घरापर्यंत पोहचले पाहिजेत, हा एकमेव ध्यास घेऊन ते ही विचारयात्रा करत आहेत. आजच्या डिजिटल युगात सोशल मीडियावर विचार मांडणे सोपे असले तरी प्रत्यक्ष गावोगावी जाऊन जनजागृती करणे ही मोठी गोष्ट आहे. हीच जबाबदारी धांडोरे यांनी खांद्यावर घेतली आहे.
त्यांच्या सायकलचा प्रत्येक फेरा हा परिवर्तनाचा संदेश देणारा ठरत असून, अशा भीमसैनिकांमुळेच बाबासाहेबांचे विचार खर्या अर्थाने समाजात रुजत असल्याची भावना व्यक्त होत आहे.
या उपक्रमाबद्दल नागरिकांकडून समाधान व्यक्त होत असून, धांडोरे यांच्या कार्याला सर्वत्र सलाम केला जातोय.
