अभिनेता गोविंदा आणि अभिनेत्री कोमल राणी स्वर्णकार यांच्या कथित नात्याची चर्चा सध्या सोशल मीडियावर सुरू आहे. लालबागच्या राजाच्या दर्शनावेळी कोमलच्या भांगेत सिंदूर दिसल्यानंतर या चर्चांना आणखी उधाण आले होते. मात्र, यापूर्वी समोर आलेल्या व्हिडीओनुसार दर्शनापूर्वी तिच्या भांगेत सिंदूर दिसत नव्हता आणि दर्शनावेळी तिच्या कपाळावर लाल रंग लागल्याचे दिसत होते. गोविंदा किंवा कोमल यांनी त्यांच्या नात्याबाबत अधिकृत दुजोरा दिलेला नाही.
या प्रकरणावर अभिनेत्री दिव्या खोसला कुमार यांनी पुन्हा सोशल मीडिया पोस्टद्वारे प्रतिक्रिया दिली आहे. कोणाचेही नाव न घेता त्यांनी धार्मिक स्थळी घडलेल्या या प्रकारावर प्रश्न उपस्थित केले.
दिव्या यांनी आपल्या पोस्टमध्ये म्हटले की, वैयक्तिक आयुष्यात प्रत्येकाला स्वतःचे निर्णय घेण्याचा अधिकार आहे; मात्र समाजातील मर्यादा आणि धार्मिक प्रतीकांचा आदर राखणे आवश्यक आहे. धार्मिक स्थळी एखाद्या महिलेच्या भांगेत सिंदूर दिसल्याने त्या जोडप्याबाबत माध्यमांमध्ये चर्चा होण्याची शक्यता निर्माण होते, असा मुद्दा त्यांनी मांडला.
तसेच सिंदूराचे धार्मिक आणि वैवाहिक महत्त्व लक्षात घेऊन अशा प्रतीकांचा वापर वैयक्तिक प्रसिद्धी किंवा इतर कोणत्याही कारणासाठी करू नये, असे मत दिव्या यांनी व्यक्त केले. त्यांच्या या पोस्टमुळे गोविंदा-कोमल राणी प्रकरणाची पुन्हा चर्चा सुरू झाली आहे.
याआधीही दिव्या खोसला यांनी गोविंदाच्या कथित नात्याबाबत प्रतिक्रिया देत त्यांच्या पत्नी सुनीता अहुजा यांना समर्थन दिले होते.
