महाराष्ट्रातील दुष्काळग्रस्त शेतकऱ्यांसाठी मोठी अपडेट समोर आली आहे. राज्यातील दुष्काळी परिस्थितीच्या पार्श्वभूमीवर शेतपिकांच्या नुकसानीचे पंचनामे सुरू असून आतापर्यंत 44 टक्के पंचनामे पूर्ण झाले आहेत. येत्या 10 ते 12 ऑक्टोबरपर्यंत 100 टक्के पंचनामे पूर्ण करण्याचे उद्दिष्ट असल्याची माहिती कृषीमंत्री दत्तात्रय भरणे यांनी दिली.
राज्यातील 265 तालुक्यांमध्ये दुष्काळ जाहीर करण्यात आला आहे. प्रत्येक जिल्ह्यातील जिल्हाधिकाऱ्यांना पंचनामे जलदगतीने पूर्ण करण्याचे निर्देश देण्यात आले आहेत. सुमारे 1 कोटी 49 लाख हेक्टर क्षेत्राचे पंचनामे करण्यात येत असून जळालेल्या पिकांचाही पंचनाम्यांमध्ये समावेश करण्याच्या सूचना देण्यात आल्या आहेत.
पंचनाम्यांच्या कामात छत्रपती संभाजीनगर विभागात 68 टक्के काम पूर्ण झाले आहे. अमरावतीमध्ये 55 टक्के, पुण्यात 30 टक्के तर नागपूरमध्ये 25 टक्के काम झाले आहे. कोकण विभागात पंचनाम्यांचे प्रमाण सर्वात कमी असल्याचे कृषीमंत्र्यांनी सांगितले.
दरम्यान, दुष्काळाच्या पाहणीसाठी केंद्रीय पथकाने राज्यातील परिस्थितीचा आढावा घेतला आहे. केंद्राकडून मदतीची प्रक्रिया अहवालानंतर पुढे जाण्याची शक्यता आहे. राज्य सरकारने चारा आणि इतर मदतीसाठी 17 हजार कोटी रुपयांची मागणी केली असल्याची माहितीही कृषीमंत्र्यांनी दिली.
पंचनामे पूर्ण झाल्यानंतर शेतकऱ्यांना मदत देण्याच्या प्रक्रियेला वेग येण्याची शक्यता आहे. त्यामुळे आता शेतकऱ्यांचे लक्ष सरकारच्या पुढील निर्णयाकडे लागले आहे.
