सांगोला-पंढरपूर रोडवरील ब्रिजजवळ घडला प्रकार
सांगोला : चारचाकी वाहनातून पाठलाग करत कार अडवून प्रवाशांना धमकावत अडीच लाख रुपयांची रोकड, मौल्यवान वस्तू असलेल्या बॅगा आणि दोन मोबाइल जबरदस्तीने हिसकावून नेले. हा धक्कादायक प्रकार रविवारी (दि. २२) रात्री ११ वाजता सांगोला-पंढरपूर मार्गावरील सोलापूर रोड ब्रिजजवळ घडला.
याप्रकरणी दिलीप भागोजी पाटील (रा. भोगम कॉलनी, चिंचवड, ता. करवीर, जि. कोल्हापूर) यांनी फिर्याद दिली असून, अज्ञात ३० ते ३५ वयोगटातील चौघांविरुद्ध बुधवारी सांगोला पोलीस ठाण्यात गुन्हा नोंदला आहे.
पोलिसांनी दिलेल्या माहितीनुसार, फिर्यादी दिलीप पाटील, त्यांची पत्नी सत्यकला पाटील आणि ओळखीचे चालक रामचंद्र साळुंखे हे तिघे २१ मार्च रोजी सायंकाळी कोल्हापूर येथून एमएच-०९-जेयू-०३७१ या कारने निलंगा (जि. लातूर) येथे जात होते. घराच्या बांधकामासाठी लागणारी सुमारे दोन लाख ५० हजार रुपयांची रोकड त्यांनी कपड्यांच्या बॅगेत ठेवून कारच्या डिकीमध्ये ठेवली होती.
दरम्यान, सांगोला हद्दीत रात्री जेवणासाठी थांबल्यानंतर ते पुढे निघाले असता, पाठीमागून आलेल्या विना नंबरच्या काळ्या चारचाकी वाहनाने त्यांच्या कारला कट मारून थांबवले. त्यानंतर एका व्यक्तीने चालकाजवळ येत शिवीगाळ व हुज्जत घालत वाद सुरू केला. त्याचवेळी इतर तिघांनी चालक व फिर्यादीला दमदाटी करत गाडीतून बाहेर काढण्याचा प्रयत्न केला.
या गोंधळात दोघांनी कारची डिकी उघडून अडीच लाख रुपयांची रोकड, आधार कार्ड, पॅन कार्ड, एटीएम कार्ड, कपडे व इतर मौल्यवान वस्तू असलेल्या दोन बॅगा काढून घेतल्या. तसेच चालकाचे दोन मोबाइलही जबरदस्तीने हिसकावून घेतले.
फिर्यादी, त्यांची पत्नी व चालक यांनी आरडाओरडा केल्याने आरोपी चौघेही त्याच गाडीतून सोलापूरच्या दिशेने भरधाव वेगाने पसार झाले. या घटनेचा पुढील तपास सहायक पोलीस निरीक्षक सागर पाटील करीत आहेत.
