बिग बॉस मराठी’ फेम रीलस्टार दिव्या शिंदे हिच्यासह आण्णा ढमढेरे आणि अन्य आठ ते दहा जणांविरोधात पुण्यात गुन्हा दाखल करण्यात आला आहे. पुणे कॅन्टोन्मेंट बोर्डाचे माजी मुख्य वैद्यकीय अधिकारी डॉ. विद्याधर गायकवाड यांनी दिलेल्या तक्रारीनुसार, ‘कला आविष्कार महोत्सवा’ची प्रसिद्धी केल्याचे सांगून त्यांच्याकडे ५ लाख रुपयांची मागणी करण्यात आली होती.
तक्रारीनुसार, ऑगस्ट महिन्यापासून फोन आणि संदेशांद्वारे पैशांची मागणी केली जात होती. १७ सप्टेंबरला दिव्या शिंदे आणि काही साथीदार गायकवाड यांच्या घरी गेले होते. त्यानंतर २३ सप्टेंबरला पुन्हा पैशांची मागणी करण्यात आल्याचा आरोप आहे.
२४ सप्टेंबरच्या रात्री दिव्या शिंदेसह काही जण गायकवाड यांच्या घरी गेले आणि त्यांच्यावर लाथाबुक्क्यांसह दांडका, बेल्ट आणि लोखंडी वस्तूने मारहाण केल्याचे तक्रारीत नमूद आहे. घरातील वस्तूंची तोडफोड तसेच कार घेऊन जाण्याची धमकी दिल्याचाही आरोप करण्यात आला आहे. जखमी गायकवाड यांच्यावर ससून रुग्णालयात उपचार सुरू असल्याचे पोलिसांनी सांगितले.
या प्रकरणी काळेपडळ पोलिसांनी भारतीय न्याय संहितेतील विविध कलमांनुसार गुन्हा दाखल केला असून, सीसीटीव्ही फुटेजच्या आधारे पुढील तपास सुरू आहे. हे सर्व आरोप तक्रार आणि पोलिसांच्या माहितीनुसार आहेत; प्रकरणाचा तपास अद्याप सुरू आहे.
