नुब्रा व्हॅलीतील बाईक अपघातात 30 वर्षीय युवकाचा मृत्यू; मित्रपरिवारासह सांगोल्यावर शोककळा
सांगोला : आयुष्यातील अविस्मरणीय क्षण अनुभवण्यासाठी लेह-लडाख सहलीला गेलेल्या सांगोला शहरातील मित्रांच्या गटावर दुःखाचा डोंगर कोसळला आहे. या सहलीदरम्यान नुब्रा व्हॅली येथे झालेल्या भीषण बाईक अपघातात सांगोल्यातील आकाश अण्णासो जाधव (वय 30) यांचा दुर्दैवी मृत्यू झाला. या घटनेमुळे सांगोला शहरासह मित्रपरिवारात शोककळा पसरली आहे.
सांगोला येथील अमित जाधव, राजीव शिर्के, सुधीर पलसे, सुमित गायकवाड, आकाश जाधव, विशाल घुटुकडे, सतीश जावीर, विजय माने तसेच मंगळवेढ्यातील एका मित्रासह एकूण नऊ जिवलग मित्र 27 मे रोजी लेह-लडाख सहलीसाठी रवाना झाले होते. निसर्गरम्य स्थळांचा आनंद घेत सहल सुरू असतानाच ही दुर्दैवी घटना घडली.
बाईक रायडिंगदरम्यान झाला अपघात
बुधवारी (3 जून) दुपारच्या सुमारास नुब्रा व्हॅली परिसरात बाईक रायडिंग सुरू असताना एका वळणावर आकाश जाधव यांच्या दुचाकीचा अपघात झाला. अपघातात ते गंभीर जखमी झाले. त्यांना तातडीने वैद्यकीय मदत उपलब्ध करून देण्याचा प्रयत्न करण्यात आला. मात्र उपचारांपूर्वीच त्यांची प्राणज्योत मालवली.
या अपघातात अमित जाधव हे देखील जखमी झाले असून त्यांच्यावर सध्या उपचार सुरू आहेत.
आनंदाच्या प्रवासावर दुःखाची छाया
एकत्र सहलीला गेलेल्या मित्रांपैकी एक जिवलग मित्र कायमचा दुरावल्याची बातमी समजताच मित्रपरिवार आणि नातेवाईकांना मोठा धक्का बसला. आनंद, उत्साह आणि आठवणींचा ठेवा घेऊन परतण्याचे स्वप्न पाहणाऱ्या मित्रांना मात्र आपल्या मित्राचे पार्थिव घेऊन परतावे लागत असल्याने सर्वत्र हळहळ व्यक्त होत आहे.
खासदार मोहिते-पाटील यांची चौकशी
घटनेची माहिती मिळताच माढा लोकसभा मतदारसंघाचे खासदार धैर्यशील मोहिते-पाटील यांनी जखमी युवकांशी तसेच सोबत असलेल्या मित्रांशी दूरध्वनीद्वारे संपर्क साधून त्यांच्या प्रकृतीची विचारपूस केली व त्यांना धीर दिला.
प्रशासनाकडून मदतीचा हात
अपघातानंतर झांस्कर-लडाख केंद्रशासित प्रदेशाचे सहाय्यक आयुक्त तथा जिल्हाधिकारी ओंकार राजेंद्र गुंदगे तसेच राज्यपालांचे विशेष कार्य अधिकारी कर्नल प्रशांत जानकर यांनी आवश्यक ती मदत उपलब्ध करून दिली. जखमींना उपचार मिळावेत तसेच आकाश जाधव यांचे पार्थिव महाराष्ट्रात पाठविण्याची प्रक्रिया जलदगतीने पूर्ण करण्यात आली.
पार्थिव पुण्याकडे रवाना
गुरुवारी दुपारी लेह येथून आकाश जाधव यांचे पार्थिव विमानाने पुण्याकडे रवाना करण्यात आले. पुणे विमानतळावर पोहोचल्यानंतर रुग्णवाहिकेद्वारे पार्थिव सांगोल्यात आणण्यात येणार असल्याची माहिती मिळाली आहे.
सांगोल्यावर शोककळा
अवघ्या तिशीत असलेल्या आकाश जाधव यांच्या अकाली निधनाने जाधव कुटुंबीयांवर दुःखाचा डोंगर कोसळला आहे. उत्साहाने सुरू झालेल्या सहलीचा शेवट अशा हृदयद्रावक घटनेत झाल्याने संपूर्ण सांगोला शहरात हळहळ व्यक्त होत असून आकाश जाधव यांना श्रद्धांजली अर्पण केली जात आहे.
मुख्य मुद्दे
- लेह-लडाखमधील नुब्रा व्हॅली येथे बाईक अपघात
- सांगोल्यातील आकाश जाधव (वय 30) यांचा मृत्यू
- अमित जाधव जखमी, उपचार सुरू
- नऊ मित्रांच्या सहलीवर दुःखाची छाया
- पार्थिव लेह हून पुणे मार्गे सांगोल्यात आणण्यात येणार
- सांगोला शहरात शोककळा पसरली
