US-Iran Tension : भारतासाठी वाईट बातमी, इराणवर पुढचा हल्ला कुठे होणार, त्या संदर्भात महत्वाची माहिती समोर

अमेरिका आणि इराणमध्ये कुठल्याही क्षणी पुन्हा युद्ध सुरु होण्याची दाट शक्यता आहे. राष्ट्राध्यक्ष डोनाल्ड ट्रम्प चीन दौऱ्यावरुन परतल्यानंतर अमेरिकेकडून लष्करी कारवाईच्या हालचाली सुरु झाल्या आहेत. अमेरिकी राष्ट्राध्यक्ष डोनाल्ड ट्रम्प यांनी इराणला पुन्हा एकदा धमकी दिली आहे. इराणने लवकर निर्णय घेतला नाही, तर त्यांच्याजवळ काही उरणार नाही असं ट्रम्प स्पष्टपणे म्हणाले आहेत. यावर्षी 28 फेब्रुवारीला अमेरिकन आणि इस्रायली एअर फोर्सने इराणवर हल्ला केला होता. इराणचे अनेक कमांडर्स, महत्वाचे लष्करी अधिकारी, रणनितीकार अमेरिका-इस्रायलने संपवले. पण त्यांना त्यांचं लष्करी उद्दिष्ट्य साध्य करता आलेलं नाही. इराण आणि अमेरिकेत सध्या सीजफायर म्हणजे युद्धबंदी लागू आहे. पण कुठल्याही क्षणी ही युद्धबंदी मोडून पडेल व पुन्हा युद्धाचा भडका उडेल अशी स्थिती आहे.

मध्यपूर्वेतील तणावाने टोक गाठलं आहे. सध्या अमेरिकेने इराणवर थेट हल्ला करण्याऐवजी स्ट्रेट ऑफ हॉर्मुजच्या नाकेबंदीचा पर्याय अवलंबला आहे. इराणने त्यांचं संवर्धित युरेनियम आपल्या ताब्यात द्यावं, काहीही करुन इराणला अणवस्त्र संपन्न देश बनू देणार नाही हे अमेरिकेने स्पष्ट केलं आहे. त्यामुळे लवकरच युद्धाचा दुसरा टप्पा सुरु होऊ शकतं. दरम्यान एक महत्वाची बातमी आहे. इस्रायली मीडिया रिपोर्ट्सनुसार इस्रायली लष्काराला हाय-अलर्टवर ठेवण्यात आलं आहे. कुठल्याही क्षणी अमेरिकेकडून लष्करी कारवाईची सुरुवात होऊ शकते अशी स्थिती आहे. त्यामुळे इस्रायली मिलिट्री हाय-अलर्टवर आहे.

यावेळी हल्ला कुठे होईल?

अमेरिकेने इराणवर नवीन हल्ले केल्यास इस्रायलच त्यात सहभाग असेल. यावेळी इराणच्या ऊर्जा प्रकल्पांना लक्ष्य केलं जाईल असं कान या पब्लिक ब्रॉडकास्टरने सूत्राच्या हवाल्याने म्हटलं आहे. अमेरिकेचे राष्ट्राध्यक्ष डोनाल्ड ट्रम्प आणि इस्रायलचे पंतप्रधान बेंजामिन नेतन्याहू यांच्यात जवळपास 30 मिनिटे चर्चा झाली.

ही भारत आणि जगासाठी चांगली बातमी नाही

इराणच्या ऊर्जा प्रकल्पांना आतापर्यंत अमेरिका-इस्रायलने जास्त हात लावला नव्हता. कारण त्यात जगाचं नुकसान होतं. आता दोन्ही देशांनी मिळून इराणच्या ऊर्जा प्रकल्पांना लक्ष्य केलं, तर इराणकडून सुद्धा आखाती देशातील तेल, गॅस प्रकल्पांवर हल्ले होऊ शकतात. अशा स्थितीत आधीच खराब स्थिती असलेल्या तेल-गॅसच अजून भीषण संकट तयार होईल. कारण या हल्ल्यांमध्ये ऊर्जा प्रकल्पांच्या इन्फ्रास्ट्रक्चरच नुकसान झालं तर त्या दुरुस्तीसाठी काही वर्ष लागू शकतात. ही भारत आणि जगासाठी चांगली बातमी नाही.