Maharashtra Politics : पुण्यात शरद पवार, अजित पवार आणि जयंत पाटील यांच्यात बंद दाराआड बैठक झाल्याची माहिती आहे. साखर संकुलात कृषी तंत्रज्ञानावर चर्चा झाली. यानंतर तीन नेत्यांमध्ये महत्त्वपूर्ण चर्चा झाली. आगामी स्थानिक स्वराज्य संस्थांच्या निवडणुकांच्या पार्श्वभूमीवर ही बैठक झाली. या बैठकीत नेमकी काय चर्चा झाली, हे अद्याप गुलदस्त्यात आहे. या भेटीमुळे राजकीय वर्तुळात चर्चांना उधाण आले आहे.
पुणे : महाराष्ट्राच्या राजकारणात काहीही घडू शकतं. आगामी काळात स्थानिक स्वराज्य संस्थांच्या निवडणुका पार पडणार आहेत. या निवडणुकीत आपल्या पक्षाला सर्वाधिक यश मिळावं, यासाठी प्रत्येक पक्षाकडून रणनीती आखली जात आहे. विशेष म्हणजे या निवडणुकांआधी दोन्ही राष्ट्रवादी काँग्रेसचे गट एकत्र येणार असल्याच्या चर्चांना उधाण आलं आहे. उपमुख्मंत्री अजित पवार यांच्या नेतृत्वातील काँग्रेस पक्ष सत्तेत आहे. तर ज्येष्ठ नेते शरद पवार यांच्या नेतृत्वातील पक्ष महाविकास आघाडीत आहे. विधानसभा निवडणुकीत अजित पवारांच्या पक्षाला चांगलं यश मिळालं. पण शरद पवारांच्या पक्षाला अपेक्षित यश मिळालं नाही. यानंतर आता आगामी स्थानिक स्वराज्य संस्थांच्या निवडणुकीआधी दोन्ही पक्ष एकत्र येणार असल्याच्या चर्चांना उधाण आलं आहे. विशेष म्हणजे या चर्चा सुरु असतानाच आता मोठी बातमी समोर येत आहे. तीन दिग्गज नेत्यांची एकत्र आणि बंद दाराआड बैठक झाल्याची माहिती समोर येत आहे.
पुण्यात साखर संकुलात आज महत्त्वाची बैठक पार पडली आहे. कृषी क्षेत्रात AI तंत्रज्ञानाचा वापर करुन शेतकऱ्यांना काय फायदा होईल, याबाबत या बैठकीत चर्चा झाली. या बैठकीला अजित पवार, शरद पवार यांच्यासह मंत्री दिलीप वळसे पाटील, माजी मंत्री जयंत पाटील यांच्यासह इतर नेतेदेखील उपस्थित होते. पण या बैठकीनंतर शरद पवार, अजित पवार आणि जयंत पाटील यांच्यात बंद दाराआड चर्चा झाल्याची माहिती आहे.
साखर संकुलाकील बैठकीनंतर शरद पवार, अजित पवार आणि जयंत पाटील वगळता सर्व नेते बैठकीतून बाहेर पडले. केवळ शरद पवार, अजित पवार आणि जयंत पाटील बैठकीच्या रुममध्ये बसून होते. या वेळी तीनही नेत्यांमध्ये बंद दाराआड बैठक पार पडली. या बैठकीत नेमकी काय चर्चा झाली? याबाबतची माहिती अद्याप समजू शकलेली नाही. पण या बैठकीची टायमिंग महत्त्वाची आहे. दोन्ही राष्ट्रवादी एकत्र येणार असल्याच्या चर्चांना उधाण आलं आहे. अशावेळी शरद पवार, अजित पवार आणि जयंत पाटील यांच्यात बंद दाराआड बैठक झाल्याची माहिती समोर आली आहे.
