Maharashtra Live News 16th April 2026 : महिला आरक्षणासाठी मोठी पावले, आजपासून सुरु होणाऱ्या विशेष अधिवेशनात सविस्तर चर्चा

Marathi News Live : महिलांना 33 टक्के आरक्षण देण्यासाठी संसदेच्या विशेष अधिवेशनात तीन महत्त्वाची दुरुस्ती विधेयके मांडली जाणार आहेत. या प्रस्तावानुसार 2029 पासून लोकसभा आणि सर्व राज्य विधानसभांमध्ये महिलांना आरक्षण लागू करण्याची तयारी आहे. यामध्ये लोकसभेच्या एकूण जागा वाढवून कमाल 850 करण्याचा प्रस्ताव असून, त्यापैकी 273 जागा महिलांसाठी राखीव असतील. राज्यांसाठी 815 तर केंद्रशासित प्रदेशांसाठी 35 जागा निश्चित करण्याचा विचार आहे. अंतिम जागावाटपासाठी मतदारसंघांची नव्याने रचना केली जाणार असून, आजपासून सुरु होणाऱ्या संसदेच्या विशेष अधिवेशनात या विधेयकांवर 18 एप्रिलपर्यंत सविस्तर चर्चा होण्याची शक्यता आहे. दुसरीकडे देशभरात उष्णतेची तीव्र लाट वाढत असून अनेक राज्यांमध्ये तापमान 40 अंशांच्या पुढे गेले आहे. हवामान विभागाने महाराष्ट्रासह अनेक भागात हीटवेव्हचा इशारा दिला आहे. त्याचवेळी काही भागात ढगाळ वातावरण व हलक्या पावसाची शक्यता वर्तवण्यात आली आहे. उष्णता आणि आर्द्रतेमुळे नागरिकांना प्रचंड त्रास होत असून काळजी घेण्याचे आवाहन करण्यात आले आहे.