MAHA TET 2025 exam : महाराष्ट्र राज्य परीक्षा परिषदेमार्फत २३ नोव्हेंबरला शिक्षक पात्रता परीक्षा (टीईटी) होणार आहे. यावर्षी ४ लाख ७५ हजार ६६८ विद्यार्थ्यांनी नोंदणी केली आहे. मागील वर्षाच्या तुलनेत नोंदणीचे प्रमाण वाढले आहे. नाशिकमध्ये ५४ परीक्षा केंद्रांवर ही परीक्षा पार पडणार आहे. केंद्रसंचालक आणि उपकेंद्रसंचालकांना रजा घेण्यास मनाई करण्यात आली आहे.
Maharashtra TET 2025 exam : महाराष्ट्र राज्य परीक्षा परिषदेमार्फत राज्यभरात २३ नोव्हेंबरला शिक्षक पात्रता परीक्षेचे (टीईटी) आयोजन करण्यात आले आहे. नाशिकमधील ५४ परीक्षा केंद्रांवर ही परीक्षा होणार आहे, अशी माहिती जिल्हा परिषदेच्या शिक्षण विभागाने दिली. या परीक्षेसाठी केंद्रसंचालक व उपकेंद्र संचालक म्हणून ५४ जणांची नियुक्ती करण्यात आली असून, त्यांना या परीक्षेचे कामकाज पाहावे लागणार आहे.
या परीक्षेसाठी १५ सप्टेंबर ते ९ ऑक्टोबरदरम्यान उमेदवारांकडून ऑनलाइन अर्ज मागविण्यात आले होते. अर्ज संख्येचा आकडा पाहता मागील वर्षीच्या तुलनेत नोंदणीचे प्रमाण मोठ्या प्रमाणात वाढल्याचे समोर आले. परीक्षेसाठी ४ लाख ७५ हजार ६६८ विद्यार्थ्यांनी नोंदणी केली आहे. यात प्राथमिक स्तरावर शिक्षक म्हणून पात्र होण्यासाठी आवश्यक असणाऱ्या पेपर-१ साठी २ लाख ३० हजार ३३३ जणांनी नोंदणी केली आहे.
तसेच माध्यमिक स्तरावर शिक्षक म्हणून पात्र होण्यास आवश्यक पेपर-२ साठी २ लाख ७२ हजार ३३५ जणांनी नोंदणी केली आहे. गेल्या वर्षाच्या तुलनेत जवळपास दीड लाखांनी हा आकडा वाढला आहे. परीक्षार्थीची संख्या वाढल्याने परीक्षा केंद्रांची संख्या यंदा वाढली आहे. नाशिकमधील विविध शाळा, महाविद्यालयातील ५४ केंद्रांवर ही परीक्षा होणार आहे. यासाठी नियुक्त केलेल्या केंद्रसंचालक तसेच केंद्र उपसंचालकांसाठी जिल्हास्तरीय मार्गदर्शन शिबिराचे आयोजन करण्यात येणार आहे. या मार्गदर्शनाचा दिवस, वेळ व स्थळ परीक्षा परिषदेमार्फत स्वतंत्रपणे कळविले जाणार आहे.
रजा घेण्यास बंधन –
शहरातील परीक्षा केंद्रांवर नियुक्ती केंद्र संचालक व उपसंचालकांना दिलेल्या प्रशिक्षणानुसार परीक्षेचे कामकाज पाहणे बंधनकारक असल्याचे जिल्हा परिषद प्रशासनाने कळविले आहे. तसेच २३ नोव्हेंबरला परीक्षा असल्याने २२ व २३ नोव्हेंबरला हे केंद्रसंचालक व उपकेंद्र संचालकांना या रजा घेता येणार नाही, असेही स्पष्ट करण्यात आले आहे.
