अभिनेत्री जान्हवी किल्लेकर आगामी मराठी चित्रपट **‘सायको रंगा’**मध्ये महत्त्वाच्या भूमिकेत दिसणार आहे. चित्रपटाच्या प्रमोशनदरम्यान तिने कोल्हापूरमधील शूटिंगचा अनुभव सांगितला. त्वचेशी संबंधित समस्या असल्याने बाहेरील ठिकाणचं पाणी आणि वातावरण आपल्याला लगेच सूट होत नसल्याचं तिने सांगितलं.
मुंबईच्या पाण्याची सवय झाल्यामुळे कोल्हापूरमध्ये शूटिंगसाठी गेल्यावर पाण्याबाबत चिंता वाटत होती, असं जान्हवीने सांगितलं. त्यामुळे तिने बिस्लेरीच्या पाण्याने अंघोळ केल्याचं सांगितलं. यासाठी मोठ्या पाण्याच्या बाटल्या आणत असल्याचं आणि त्याचा खर्च स्वतः करत असल्याचंही तिने म्हटलं.
वक्तव्य सोशल मीडियावर व्हायरल
जान्हवीचा हा किस्सा समोर आल्यानंतर सोशल मीडियावर त्याची जोरदार चर्चा झाली. काही युजर्सनी तिच्या वक्तव्यावर प्रश्न उपस्थित केले, तर काहींनी कमेंट्सच्या माध्यमातून तिच्यावर टीका केली. एका युजरने मुंबईचं पाणी कोल्हापूरच्या पाण्यापेक्षा स्वच्छ आहे का, असा सवाल करत अभिनेत्रीला टोला लगावला.
ट्रोलर्सना जान्हवीचं थेट उत्तर
या ट्रोलिंगवर जान्हवीनेही प्रतिक्रिया दिली. व्हायरल व्हिडीओवरील एका कमेंटला उत्तर देताना तिने केवळ “Trollers welcome” असं लिहिलं आणि त्यासोबत टाळ्यांचे इमोजी वापरले.
जान्हवीच्या या दोन शब्दांच्या प्रतिक्रियेमुळे तिच्या वक्तव्याची आणि ट्रोलिंगची चर्चा पुन्हा सोशल मीडियावर सुरू झाली आहे.
दरम्यान, ‘सायको रंगा’मध्ये जान्हवी किल्लेकरसोबत स्मिता गोंदकर, सुबोध भावे, पुष्कर जोग आणि मिलिंद शिंदे यांसारखे कलाकार महत्त्वाच्या भूमिकेत आहेत. चित्रपटाच्या प्रमोशनमुळे सध्या हा सिनेमा चर्चेत आहे.
