आयपीएल 2025 स्पर्धेच्या क्वॉलिफायर 1 सामन्यात पंजाब किंग्स आणि रॉयल चॅलेंजर्स बंगळुरु हे संघ आमनेसामने येणार आहेत. या सामन्यातील विजयी संघ अंतिम फेरी गाठणार आहे. त्यामुळे हा सामना खूपच महत्त्वाचा आहे. या सामन्यासाठी आरसीबी संघात दोन बदल अपेक्षित आहेत.
आयपीएल 2025 स्पर्धेतील पहिल्या क्वॉलिफायर फेरीची उत्सुकता शिगेला पोहोचली आहे. या फेरीत कधीही जेतेपद न जिंकणारे दोन संघ आमनेसामने येणार आहेत. पंजाब किंग्स आणि रॉयल चॅलेंजर्स बंगळुरु या दोन्ही संघांची मागच्या 17 पर्वात झोळी रिती आहे. त्यामुळे या दोन्ही संघांसाठी जेतेपद जिंकण्याची एक मोठी संधी चालून आली आहे. अंतिम फेरी गाठण्यासाठी या सामन्यात विजय महत्त्वाचा आहे. त्यामुळे आरसीबीने या सामन्यासाठी एक मजबूत प्लेइंग 11 खेळवेल यात काही शंका नाही. आरसीबी प्लेइंग 11 मध्ये दोन बदल करण्याची शक्यता आहे. जोश हेझलवूड खांद्याच्या दुखापतीतून सावरला आहे. क्वॉलिफायर फेरीसाठी सज्ज असल्याचं फलंदाज प्रशिक्षक दिनेश कार्तिक याने सांगितलं आहे. मागच्या काही सामन्यात त्याची उणीव भासली होती. नुवान तुषाराच्या जागी त्याची प्लेइंग 11 मध्ये वर्णी लागू शकते.
लियाम लिव्हिंगस्टोनच्या जागी दुसरा खेळाडू प्लेइंग 11 मध्ये असेल. टिम डेव्हिड जर पूर्णपणे बरा झाला असेल तर त्याची जागा घेईल. पण टिम डेव्हिड तंदुरुस्त नसेल तर टिम सेफर्टला संधी मिळण्याची शक्यता आहे. कारण लियाम लिव्हिंगस्टोनने आरसीबीसाठी 8 सामने खेळले आहेत आणि यावेळी त्याने फक्त 87 धावा केल्या आहेत. लखनौ विरुद्ध टॉप 2 साठी झालेल्या लढतीत तर लियामने पहिल्या चेंडूवर विकेट टाकली. त्यामुळे लियामला पंजाब किंग्सविरुद्धच्या सामन्यातून वगळण्यात येईल हे निश्चित आहे. या दोन खेळाडूंव्यतिरिक्त लखनौ सुपरजायंट्स विरुद्धच्या सामन्यात खेळलेले उर्वरित खेळाडू पंजाब किंग्स विरुद्ध खेळतील.
विराट कोहली आणि फिल साल्ट हे सलामीवीर असतील. जर टिम डेव्हिड तंदुरुस्त नसेल तर टिम सेफर्टला तिसऱ्या क्रमांकावर खेळेल. रजत पाटीदार चौथ्या क्रमांकावर फलंदाजी करेल आणि मयंक अग्रवाल पाचव्या क्रमांकावर फलंदाजी करेल. जितेश शर्मा फिनिशरच्या भूमिकेत दिसेल. सहाव्या किंवा गरजेनुसार वर देखील फलंदाजीला उतरू शकते. कृणाल पांड्या सातव्या क्रमांकावर दिसेल, तर रोमारियो शेफर्ड तळाशी येत मोठी फटकेबाजी करू शकतो. जोश हेझलवूड, यश दयाल आणि भुवनेश्वर कुमार हे गोलंदाज म्हणून मैदानात उतरतील हे निश्चित आहे.
