Hrithik Roshan Working With Hombale Films: अभिनेता हृतिक रोशन लवकरच ‘कांतारा’, ‘केजीएफ’चे निर्माते असणाऱ्या प्रोडक्शन कंपनीसोबत काम करताना दिसणार आहे. या निर्मिती संस्थेने तशी घोषणाही केली.
मुंबई: दाक्षिणात्य सिनेमा विश्वातील कलाकार हिंदी चित्रपटसृष्टीमध्ये अनेकदा काम करताना दिसतात. याशिवाय हिंदीतील सुपरस्टार्सनीही साऊथ सिनेमांकडे मोर्चा वळवला आहे. पूर्वी दाक्षिणात्य सिनेमांमध्ये पाहुण्या कलाकाराची भूमिका साकारणारे बॉलिवूड स्टार्स आता साऊथ इंडस्ट्रीत मोठ्या भूमिका करताना दिसत आहेत. या कलाकारांच्या यादीमध्ये आता बॉलिवूडचा सुपरस्टार Hrithik Roshan चे नाव जोडले गेले आहे. कन्नड सिनेविश्वातील आघाडीची निर्मिती संस्था असणाऱ्या Hombale Films ने याविषयी घोषणा केली आहे, ज्यांनी ‘KGF’ फ्रँचायझी आणि ‘कांतारा’सारखे चित्रपट दिले आहेत.
‘होंबळे फिल्म्स’ने याविषयी एक पोस्ट शेअर केली आणि यानंतर चाहत्यांमध्ये विशेष चर्चा रंगली आहे. हृतिक कोणत्या सिनेमात दिसणार हे जाहीर करण्यात आले नसले तरी, तो KGF 3 चा भाग असेल का, याविषयी चाहते विचारणा करत आहेत.
प्रोडक्शन हाऊसने शेअर केलेल्या पोस्टमध्ये असे लिहिले आहे की, ‘त्याला ग्रीक गॉड म्हणतात. त्याने प्रेक्षकांच्या मनावर अधिराज्य केले, मर्यादा तोडल्या आणि तो खरोखर कसा आहे हे आम्ही पाहतोय! हृतिक रोशनचे होंबळे फिल्म्सच्या कुटुंबात स्वागत करताना आम्हाला अभिमान वाटतो. जिद्द, भव्यता आणि वैभवाची एक कहाणी उलगडणार, ज्यामध्ये तीव्रता आणि कल्पनाशक्तीचा मिलाफ पाहायला मिळेल, बिग बँगची सुरुवात झाली आहे.’
होंबळे फिल्म्सकडून शेअर करण्यात आलेल्या या पोस्टवर हृतिकनेही कमेंट केली आहे. या प्रोजेक्टसाठी उत्सुक असल्याचे तो म्हणाला. अद्याप होंबळे फिल्म्स किंवा हृतिककडून हा कोणता सिनेमा असेल, याविषयी तपशील समोर आलेला नाही. पण सोशल मीडियावरील या पोस्टनंतर चाहत्यांमध्ये मात्र वेगळीच चर्चा रंगली आहे. हृतिक KGF या फ्रँचायझीमध्ये एन्ट्री करणार आहे का, असा सवाल विचारला जातो आहे.
चाहत्यांच्या असंख्य कमेंट्स
चाहत्यांकडून अभिनेत्याचे साऊथ इंडस्ट्रीतील प्रसिद्ध निर्मात्यांच्या सिनेमात जोरदार स्वागत झाले. एका चाहत्याने असे लिहिले की, ‘अखेर HR च्या पात्रतेचा सिनेमाला त्याला मिळाला.’ अन्य एकाने लिहिले की, ‘कल्पना करा की हृतिक आणि यश KGF 3 मध्ये एकत्र असतील’, तर एक कमेंट अशीही आहे की, ‘हृतिक X यश, स्क्रिन्सवर आग लागणार’. अनेकांनी या सिनेमाला आधीच ब्लॉकबस्टर घोषित केले आहे.
दरम्यान ‘वॉर 2’मध्येही हृतिक रोशन सुप्रसिद्ध दाक्षिणात्य अभिनेता ज्युनिअर एनटीआरशी दोन हात करताना दिसणार आहे. अयान मुखर्जी दिग्दर्शित या चित्रपटात कियारा आडवाणीही मुख्य भूमिकेत आहे.
हेही वाचा
Waterproof आणि Water Resistant मध्ये काय फरक? जाणून घ्या
