WTC 2025 : दक्षिण अफ्रिकेने टेस्ट चॅम्पियनशिप अंतिम फेरीसठी कंबर कसली, भारताशी होणार सामना?
भारताने टी20 वर्ल्डकप 2024 स्पर्धेत दक्षिण अफ्रिकेचा अंतिम फेरीत धुव्वा उडवून चषकावर नाव कोरलं होतं. आता पुन्हा एकदा हे दोन संघ वर्ल्ड टेस्ट चॅम्पियनशिप अंतिम फेरीत आमनेसामने येण्याची शक्यता आहे. तसं समीकरण जुळून आलं आहे. त्यामुळे भारत आणि दक्षिण अफ्रिका सामना पाहण्याची संधी क्रीडारसिकांना मिळू शकते. वर्ल्ड टेस्ट चॅम्पियनशिप 2025 स्पर्धेच्या अंतिम फेरीसाठी भारत, ऑस्ट्रेलिया आणि दक्षिण अफ्रिका यांच्यात चुरस आहे. दुसरीकडे न्यूझीलंड, इंग्लंड, श्रीलंका, पाकिस्तान, बांग्लादेश आणि वेस्ट इंडिज हे संघ स्पर्धेतून बाद झाले आहेत. त्यामुळे भारत आणि दक्षिण अफ्रिका हे संघ आमनेसामने येऊ शकतात. यासाठी फक्त एक समीकरण जुळलं की झालं. भारताचे वर्ल्ड टेस्ट चॅम्पियनशिप स्पर्धेत दोन सामने शिल्लक आहेत. दक्षिण अफ्रिकेचे दोन आणि ऑस्ट्रेलियाचे चार सामने उरले आहेत.
…तर भारत आणि दक्षिण अफ्रिका अंतिम सामना
भारताचे ऑस्ट्रेलियाविरुद्ध दोन कसोटी सामने शिल्लक आहेत. भारताने या दोन्ही सामन्यात विजय मिळवला तर अंतिम फेरीत स्थान पक्कं होईल. पण एका सामन्यात विजय आणि एका सामन्यात पराभव झाला तर श्रीलंका ऑस्ट्रेलिया मालिकेवर अवलंबून राहावं लागेल. श्रीलंकेने काहीही करून ऑस्ट्रेलियाला एका सामन्यात पराभूत करावं लागेल. जर ऑस्ट्रेलियाविरुद्ध दोन्ही सामन्यात पराभव झाला तर भारताचं अंतिम फेरीचं स्वप्न भंगेल.
दक्षिण अफ्रिकेचं अंतिम फेरीतील स्थान जवळपास निश्चित आहे. दक्षिण अफ्रिकेला पाकिस्तानविरुद्ध दोन पैकी एका सामन्यात विजय मिळवायचा आहे. पण दोन्ही सामन्यात पराभव झाला तर ऑस्ट्रेलिया आणि भारताच्या कामगिरीवर लक्ष ठेवावं लागेल. जर भारताने उर्वरित दोन्ही सामने जिंकले आणि दक्षिण अफ्रिकेने एक सामना जिंकला तर वर्ल्ड टेस्ट चॅम्पियनशिप अंतिम फेरीत भारत आणि दक्षिण अफ्रिका सामना पाहायला मिळेल.
