शिवसेनेचा नवा चेहरा म्हणून अलीकडे सुषमा अंधारे गाजत आहेत. राज्यातील शिंदे सरकारने त्यांचा धसका घेतला की काय अशी परिस्थिती निर्माण झाली आहे. अंधारे या आक्रमक बोलत आहेत. त्यांनी अनेक नेत्यांची पोलखोल केली आहे. यामुळे त्यांच्याबद्दल वेगळीच प्रतिमा निर्माण झाली आहे. त्या बेधडकपणे बोलताना दिसत आहेत.
दरम्यान त्यांना रोखण्यासाठी शिंदे सरकारने वेगळीच खेळी केली आहे. अंधारे यांचे विभक्त पती वैजिनाथ वाघमारे हे आज शिंदे गटात डेरे दाखल होणार आहेत. आज सायंकाळी हा कार्यक्रम होणार आहे. दरम्यान आगामी काळात सुषमा अंधारे यांचा पर्दाफाश करण्याचा इशारा वाघमारे यांनी दिला आहे.
आपण सुषमा यांच्याबरोबर पंधरा वर्षे काम केले आहे. पाच सहा वर्षांपासून त्यांचा व माझा काहीही संबंध राहिला नाही. परंतु त्यांनी राज्यातील एका मंत्र्यांबद्दल केलेल्या टिपणी बद्दल पर्दाफाश करणार असल्याचे वाघमारे यांनी सांगितले. मुख्यमंत्री एकनाथ शिंदे यांनी अतिशय कमी वेळेत उत्कृष्ट काम केले आहे त्यांच्या या कामामुळे मी भारावलो आहे. त्यामुळेच शिंदे गटात जात असल्याची माहिती त्यांनी माध्यमांना दिली.
