महाराष्ट्रात यंदा पावसाने मोठी ओढ दिल्यानंतर आता परतीचा पाऊस सक्रिय होण्याची शक्यता आहे. भारतीय हवामान विभागाने राज्यातील काही भागांसाठी पावसाचा इशारा दिला आहे. कोकण, मध्य महाराष्ट्र आणि मराठवाड्यातील काही जिल्ह्यांमध्ये पाऊस पडण्याचा अंदाज आहे.
हवामान विभागाच्या माहितीनुसार, मुंबई, पालघर, ठाणे, रायगड, रत्नागिरी, धुळे, नंदुरबार, जळगाव, नाशिक, अहिल्यानगर, पुणे, सांगली आणि सोलापूर या जिल्ह्यांमध्ये हलका ते मध्यम स्वरूपाचा पाऊस होण्याची शक्यता आहे.
दरम्यान, सिंधुदुर्ग, कोल्हापूर आणि सातारा या जिल्ह्यांसाठी येलो अलर्ट जारी करण्यात आल्याची माहिती आहे. काही भागांत पावसासोबत विजांचा कडकडाट होण्याची शक्यता आहे. तसेच ताशी 30 ते 40 किलोमीटर वेगाने वारे वाहण्याचा अंदाज वर्तवण्यात आला आहे.
मराठवाड्यातील काही भागांतही पावसाची शक्यता आहे. यंदाच्या पावसाच्या अनियमिततेमुळे राज्यातील शेती आणि पाणीपुरवठ्यावर परिणाम झाला आहे. त्यामुळे परतीच्या पावसाकडे शेतकऱ्यांचे लक्ष लागले आहे.
विजांच्या कडकडाटासह पाऊस आणि जोरदार वारे असताना नागरिकांनी अनावश्यकपणे घराबाहेर पडणे टाळावे, तसेच सुरक्षित ठिकाणी राहण्याचे आवाहन करण्यात आले आहे.
