जागतिक महिला दिनाच्या निमित्ताने ‘मुख्यमंत्री लाडकी बहीण योजना’चे फेब्रुवारी आणि मार्च महिन्यांचे हप्ते शुक्रवारी वाटप करण्यात आले. दोन कोटी ५२ लाख महिलांच्या बँक खात्यात प्रत्येकी १५०० रुपये जमा करण्यात आले. उपमुख्यमंत्री एकनाथ शिंदे यांनी योजनेच्या लाभार्थी महिलांसाठी दरमहा २१०० रुपये देण्याचे आश्वासन दिले आहे.
मुंबई : मुख्यमंत्री लाडकी बहीण योजनेच्या लाभार्थी महिलांना फेब्रुवारी आणि मार्च महिन्यांच्या हप्त्यांचे वाटप सुरू करण्यात आले आहे. जागतिक महिला दिनाचे औचित्य साधून शुक्रवारपासून या हप्त्यांचे वाटप सुरू झाल्याची माहिती मंत्री अदिती तटकरे यांनी दिली. या योजनेअंतर्गत राज्यातील दोन कोटी ५२ लाख लाडक्या बहिणींच्या बँक खात्यात शुक्रवारी संध्याकाळपर्यंत १५०० रुपये जमा करण्यात आल्याची माहिती तटकरे यांनी दिली.
फेब्रुवारी महिन्यात एकूण किती लाभार्थी पात्र ठरणार, याबाबत उत्सुकता लागून होती. प्राप्तिकर विभागाचा अहवाल प्राप्त होण्यास उशीर लागल्याने फेब्रुवारी महिन्याच्या हप्त्याचे वितरण करण्यास उशीर लागला होता. त्याचवेळी राज्याच्या महिला व बालविकास मंत्री अदिती तटकरे यांनी फेब्रुवारी आणि मार्च हप्त्याचे वितरण जागतिक महिला दिनाच्या निमित्ताने करण्यात येईल, असे स्पष्ट केले होते. अखेर शुक्रवारी जागतिक महिला दिनाच्या पूर्वसंध्येला फेब्रुवारी महिन्यातील हप्त्पाचे वाटप सुरू झाले आहे. ‘जागतिक महिला दिनाचे औचित्य साधून लाडक्या बहिणींच्या बँक खात्यात फेब्रुवारी व मार्च असे दोन्ही महिन्याचे पैसे जमा करण्याचा निर्णय घेतला होता. त्यामुळे महिला दिनाच्या पूर्वसंध्येला शुक्रवार ७ मार्चला दोन कोटी ५२ लाख पात्र महिलांच्या बँक खात्यात पैसे जमा झाले आहेत’, असे तटकरे यांनी सांगितले.
‘राज्य सरकार लाडक्या बहिणींच्या पाठीशी नेहमीच ठाम उभे राहणार आहे. राज्य आणि केंद्राच्या माध्यमातून महिलांसाठी अनेक योजना सुरू असून लाडक्या बहिणींचा सन्मान राखण्यासाठी त्यांना स्वावलंबी करण्यासाठी आम्ही काम करीत आहोत. त्याचवेळी आपली लाडकी बहीण सुरक्षित राहिली पाहिजे, हेच आमचे प्रमुख ध्येय असून त्या दृष्टिकोनातून राज्यातील महिलांसाठी सुरक्षा ॲप सुरू करण्यात येणार आहे,’ अशी घोषणा उपमुख्यमंत्री एकनाथ शिंदे यांनी शनिवारी जागतिक महिला दिनाच्या निमित्ताने केली. जागतिक महिला दिनाच्या निमित्ताने सह्याद्री अतिथीगृहावर आयोजित कार्यक्रमानंतर शिंदे यांनी पत्रकारांशी संवाद साधला.
‘लाडक्या बहीण योजनेतील लाभार्थींना दरमहा २,१०० रुपये देण्याचे आश्वासन आम्ही आमच्या जाहीरनाम्यात दिले होते आम्ही आश्वासनांची पूर्तता करणार आहोत. यात कोणतीही शंका नाही. २१०० रुपयांबाबत नियोजन सुरू असून आम्ही आमच्या घोषणेचे नक्कीच पालन करू,’ असे त्यांनी स्पष्ट केले.
हे ही वाचा
चॅम्पियन्स ट्रॉफीत गोल्डन बॉलचा मानकरी कोण ठरणार? शर्यतीत दोन भारतीय गोलंदाज
