Pune Police News : पुणे पोलिसांच्या कामगिरीने तुम्हालाही अभिमान वाटेल, पोलिसांना आलेल्या एका संशयाने मोठा उलगडा झालाय. नेमकं हायवेवर काय घडलं होतं? जाणून घ्या.
पुणे : राजगुरूनगर परिसरात दरोडा घालण्याच्या तयारीत असलेल्या गुजरातच्या आंतरराज्य गुन्हेगार टोळीचा कट उधळण्यात स्थानिक गुन्हे अन्वेषण (ग्रामीण) शाखेला मोठे यश मिळाले आहे. पोलिसांनी तीन आरोपींना ताब्यात घेऊन पाच जणांवर गुन्हा नोंदवला आहे. दरोडा टाकण्याच्या तयारीत असलेल्या गुजरातमधील आंतरराज्य टोळीचा गुन्हेगारी मोठा कट उधळला आहे. पोलिसांनी तीन आरोपींना ताब्यात घेतले असून त्यांच्या आणखी दोन साथीदारांचा शोध सुरू आहे.
पोलिसांनी दिलेल्या माहितीनुसार मंगळवारी रात्री खेड पोलीस ठाण्याच्या हद्दीत गस्त घालत असताना होलेवाडी भागात पुणे-नाशिक महामार्गालगत एक टाटा टेम्पो अतिशय संशयित स्थितीत उभा असल्याचे पथकाला दिसले. पाहणी केली असता वाहनात पाच जण बसल्याचे लक्षात आले. चौकशीदरम्यान त्यांपैकी दोघेजण अंधारात पळून जाण्यात यशस्वी झाले तर उर्वरित तिघांना ताब्यात घेण्यात आले. त्यांची ओळख इरपन अब्दुलअमीद दुर्वेश, मोहम्मद अली हुसेन रेहमत आणि उमर फारूख अन्नसत्तार अशी पटली आहे. सर्व आरोपी हे गोध्रा-गुजरात येथील रहिवासी असल्याचे समोर आले आहे.
अटक केलेल्या आरोपींच्या तपासात गुजरातसह आळेफाटा, मंचर, सिन्नर, तसेच गोध्रा परिसरात चोरी आणि दरोड्याचे गुन्हे नोंद असल्याचे उघड झाले. तसेच 14 नोव्हेंबरला शिक्रापूर हद्दीत कोंडापुरीजवळील पेट्रोल पंपाजवळ उभ्या ट्रकमधून 5 लाखांहून अधिक किमतीचा माल चोरल्याची कबुली आरोपींनी तपासात दिली आहे. तर, टेम्पोची तपासणी केली असता दरोड्यासाठी वापरली जाणारी स्क्रूड्रायव्हर, लोखंडी रॉड, कटावणी, धारदार पट्टी, कटर, बॅटरी, चॉपर इत्यादी साहित्य सापडले. चौकशीत आरोपींनी यापूर्वी गुजरातसह आळेफाटा, सिन्नर, मंचर आणि इतर भागात मालवाहतूक करणाऱ्या वाहनांना लुटल्याची माहिती समोर आली.
ही टोळी गुजरात मधून महाराष्ट्रात महामार्गावरील टायर दुकाने आणि टायर वाहतूक करणाऱ्या ट्रकांचे रेकी करत संधी मिळताच लूटमार करत. त्यांच्या हालचालींची गुप्त माहिती मिळाल्यानंतर टोलनाके आणि माहितीदारांच्या मदतीने पोलिसांनी या टोळीवर लक्ष ठेवले होते. योग्य वेळ साधून करण्यात आलेल्या कारवाईमुळे मोठा गुन्हा टळल्याचे पोलिसांनी सांगितले.
इरपन अब्दुल अमीद दुर्वेश, (वय 42, रा. पोलंडबाजार, बालेपडीलया, नं. 1, गोद्रा, ता. बी डीव्हिजन, जि. पंचमहल, राज्य गुजरात) मोहम्मद अली हुसेन रेहमत (वय 21, रा. पोलंडबाजार, वालेपडीलया, नं. 1, गोद्रा, ता. बी डीलिजन, नि. पंचमहल, राज्य गुजरात), उमर फारूख अन्नसत्तार ( वय 36, रा. गेहमीपलोट, वैद्यालपुर, गोळा, ता. बी डीशिजन, नि, पंगमहल, राज्य गुजरात) जुनेद व जुनेदचा मित्र असे अटक करून गुन्हा दाखल करण्यात आलेल्या आरोपींची नावे आहेत. सर्व आरोपी गोध्रा गुजरात येथील रहिवासी आहेत. या कारवाईत वरिष्ठ पोलीस निरीक्षक अविनाश शिळीमकर यांच्या मार्गदर्शनाखाली स्थानिक गुन्हे अन्वेषण पथक आणि खेड पोलीस ठाण्याच्या पथकाने संयमाने आणि नियोजनबद्ध पद्धतीने ही मोहिम राबवली. पसार झालेल्या दोघा आरोपींचा शोध घेण्यासाठी सध्या पोलिसांचे विशेष पथक काम करत असून तपासादरम्यान आणखी गुन्हे उघडकीस येण्याची शक्यता व्यक्त केली जात आहे.
