राष्ट्रवादीच्या दोन्ही गटांच्या विलिनीकरणाची चर्चा पुन्हा सुरू; हसन मुश्रीफ म्हणाले, “अटी घालून ऑफर कशी चालेल?”

महाराष्ट्राच्या राजकारणात राष्ट्रवादी काँग्रेसच्या दोन्ही गटांच्या संभाव्य विलिनीकरणाची चर्चा पुन्हा एकदा सुरू झाली आहे. शरद पवार गटाचे नेते रोहित पवार यांनी यापूर्वी विलिनीकरणाबाबत भूमिका मांडताना अजित पवारांच्या नेतृत्वातील राष्ट्रवादीने भाजपसोबतची आघाडी सोडण्याची अट व्यक्त केली होती. त्यानंतर आता अजित पवार गटाचे ज्येष्ठ नेते आणि मंत्री हसन मुश्रीफ यांच्या वक्तव्यामुळे या चर्चेला पुन्हा वेग आला आहे.
नंदूरबार येथे माध्यमांशी बोलताना हसन मुश्रीफ यांना राष्ट्रवादीच्या दोन्ही गटांच्या विलिनीकरणाबाबत प्रश्न विचारण्यात आला. त्यावर त्यांनी सांगितले की, अजित पवारांच्या नेतृत्वाखाली महायुतीत जाण्याचा निर्णय जाणीवपूर्वक घेण्यात आला होता आणि सध्या महायुती सोडण्याचा विचार नाही. मात्र विलिनीकरण व्हावे किंवा नाही, हा संबंधित पक्षांचा निर्णय असल्याचे त्यांनी स्पष्ट केले.
“आम्ही युतीमध्ये होतो आणि युतीमध्ये राहणार आहोत. अटी घालून ऑफर येत असतील तर कसं चालेल?” अशी भूमिका मुश्रीफ यांनी मांडली. यापूर्वी अजित पवारांकडूनही विलिनीकरणासाठी प्रयत्न झाले होते, असे संकेत त्यांनी दिले.
अजित पवारांच्या अपघाताच्या चौकशीची मागणी
हसन मुश्रीफ यांनी अजित पवारांच्या अपघाताच्या तपासाबाबतही भाष्य केले. या प्रकरणाची सीबीआय चौकशी करण्याची मागणी त्यांनी मुख्यमंत्र्यांकडे केली असल्याचे सांगितले. विमानातील ब्लॅक बॉक्स मिळाला असून त्यातील संभाषण रेकॉर्ड झाले असल्याचा दावा करत, तपासाला वेग देण्याची मागणी त्यांनी केली.
गोकुळ निवडणुकीत राष्ट्रवादी मोठा भाऊ
गोकुळ दूध संघाच्या निवडणुकीबाबतही मुश्रीफ यांनी भूमिका स्पष्ट केली. ही निवडणूक महायुती म्हणून लढवली जाईल, असे त्यांनी सांगितले. या निवडणुकीत राष्ट्रवादी काँग्रेस मोठा भाऊ राहणार असल्याचेही त्यांनी नमूद केले.
दरम्यान, 22 सप्टेंबर रोजी राष्ट्रवादी काँग्रेसचे नेते सुनील तटकरे यांनी दोन्ही राष्ट्रवादी गटांच्या विलिनीकरणाच्या चर्चेला आधार नसल्याचे म्हटले होते. त्यामुळे मुश्रीफ यांच्या वक्तव्यामुळे या विषयावर पक्षातील वेगवेगळ्या नेत्यांच्या भूमिकांकडे राजकीय वर्तुळाचे लक्ष लागले आहे.
जरांगे पाटील यांच्या आंदोलनावरही भाष्य
मनोज जरांगे पाटील यांच्या आंदोलनाबाबत बोलताना मुश्रीफ यांनी सरकारने मराठा समाजाशी संबंधित आश्वासने पूर्ण केल्याचे म्हटले. सणासुदीचे दिवस असल्याने जरांगे यांनी उपोषण मागे घ्यावे, असे आवाहनही त्यांनी केले.