मुंबई; अंशतः अनुदानित शाळेतील शिक्षक व शिक्षकेतर कर्मचारी हे तूटपुंज्या वेतनावर गेले अनेक वर्ष काम करत आहेत. या कर्मचाऱ्यांना शंभर टक्के वेतन मिळावे यासाठी सातत्याने शासन दरबारी, आंदोलनाच्या माध्यमातून शासनाकडे मागणी केली असता शासन अजूनही या शिक्षक व शिक्षकेतर कर्मचारी यांना टप्पा वाढ अनुदान देत नाही. म्हणून शिक्षण समन्वय संघ यांच्या माध्यमातून आझाद मैदान मुंबई येथे आंदोलन सुरू केली आहे.
याबाबत काल राज्याचे उपमुख्यमंत्री एकनाथ शिंदे यांची भेट घेऊन ,राज्यात आपण १० ऑक्टोबर २०२४ रोजी झालेल्या मंत्रिमंडळ बैठकीत या कर्मचाऱ्यांना वाढीव टप्पा देण्याबाबतचा ठराव मंजूर केला होता व त्यास अनुसरून १४ ऑक्टोबर २०२४ ला शासन आदेश ही काढला होता. परंतु या शासन निर्णयाची अजूनही अंमलबजावणी झाली नाही म्हणून एकनाथ शिंदे यांची भेट घेत त्यांना त्यांच्या काळात घेतलेल्या निर्णयाची अंमलबजावणी करण्याची विनंती केली असता, उपमुख्यमंत्री एकनाथ शिंदे यांनी या शिक्षकांना वाढीव टप्पा देण्याचे काम सुरू असल्याचे अभिवचन दिले. व येणाऱ्या अधिवेशनात या शिक्षकांना टप्पा वाढ केली जाईल याबाबतची माहिती दिली.
सदर चर्चेमध्ये कोकण विभाग शिक्षक मतदार संघातील आमदार ज्ञानेश्वर म्हात्रे,माजी आमदार श्रीकांत देशपांडे उपस्थित होते.
