टेम्पोच्या काचा फोडून लोखंडी सळ्या मुलांच्या शरीरात घुसल्या, 6 जणांचा मृत्यू, 5 जण जखमी
नाशिकमधून मोठी बातमी समोर येत आहे, नाशिकमध्ये भीषण अपघात झाला आहे. नाशिक- मुंबई- अग्रा महामार्गावर असलेल्या उड्डाण पुलावर हा भीषण अपघात झाला आहे. या अपघातामध्ये सहा जणांचा मृत्यू झाला आहे. तर पाच जण गंभीर जखमी झाले आहेत, जखमींना स्थानिकांच्या मदतीनं जिल्हा रुग्णालयात हलवण्यात आलं आहे. यातील दोन जणांची प्रकृती चिंताजनक असल्याची माहिती समोर आली आहे. नाशिकच्या द्वारका उड्डाणपुलावर हा अपघात झाला आहे. पिकअप आणि आयशरमध्ये हा अपघात झाला. लोखंडी गजाने भरलेल्या आयशर गाडीला पाठीमागून वेगात आलेल्या पिकअप गाडीने धडक दिली. या घटनेत मृत्यू झालेले सर्वजण कामगार असल्याची माहिती समोर येत आहे. अपघातातील मृतांची नावं अद्याप समोर आलेली नाहीयेत.
घटनेबाबत अधिक माहिती अशी की, नाशिकच्या द्वारका उड्डाणपुलावर हा भीषण अपघात झाला आहे. पिकअप आणि आयशरमध्ये हा अपघात झाला. लोखंडी गजाने भरलेल्या आयशर गाडीला पाठीमागून वेगात आलेल्या पिकअप गाडीने धडक दिली. या घटनेत सहा जणांचा मृत्यू झाला असून, पाच जण गंभीर जखमी आहेत. त्यांना उपचारासाठी स्थानिकांच्या मदतीनं जिल्हा रुग्णालयात दाखल करण्यात आलं आहे, त्यातील दोघांची प्रकृती चिंताजनक असून, मृतांचा आकडा वाढण्याची भीती व्यक्त केली जात आहे.
पिकअप टेम्पोमधील मुलांचं शेवटचं स्टेटस व्हायरल
नाशिकमधील या दुर्घटनेत मृत्यू झालेली मुलं ही सिडकोच्या सह्याद्रीनगर परिसरातील रहिवाशी होती. हे सर्वजण निफाड तालुक्यातील धारणगाव येथे देवाचे कारण या कार्यक्रमासाठी गेले होते. हा कार्यक्रम आटोपून महिलांचा टेम्पो आणि पुरुषांचा टेम्पो पुन्हा नाशिकच्या दिशेने परतत होते. महिलांचा टेम्पो सुरक्षितपणे सह्याद्रीनगर येथे पोहोचला. मात्र, पुरुषांच्या ट्रकचा द्वारका पुलावर अपघात झाला.
या अपघाताच्या काहीवेळापूर्वीच पिकअप टेम्पोमधील मुलांनी सोशल मीडियावर एक स्टेटस शेअर केले होते. यामध्ये टेम्पोच्या मागच्या बाजूला ही सर्व मुले गाण्यावर नाचत होती. काही मुले टेम्पोच्या वरच्या भागावर चढून बसली होती. सर्वजण आनंदात होते. मात्र, पुढील काही क्षणांमध्येच त्यांच्यावर काळाने घाला घातल्याने सह्याद्रीनगर परिसरात हळहळ व्यक्त केली जात आहे.
