महाराष्ट्रातील दुष्काळी परिस्थितीच्या पार्श्वभूमीवर शेतकऱ्यांच्या प्रश्नांसाठी राष्ट्रवादी काँग्रेसचे अध्यक्ष शरद पवार यांच्या नेतृत्वाखाली 26 सप्टेंबर रोजी पंढरपुरात दुष्काळ आक्रोश मोर्चाचे आयोजन करण्यात आले होते. शेतकऱ्यांना तातडीने मदत मिळावी आणि दुष्काळाबाबत सरकारने ठोस निर्णय घ्यावा, अशी मागणी या मोर्चातून करण्यात येणार असल्याची माहिती खासदार धैर्यशील मोहिते पाटील यांनी दिली.
मोर्चापूर्वी पक्षाचे आमदार आणि खासदार विठ्ठल मंदिरात जाऊन सरकारला शेतकऱ्यांच्या प्रश्नांवर निर्णय घेण्याची सद्बुद्धी मिळावी, यासाठी प्रार्थना करणार असल्याचेही सांगण्यात आले.
दरम्यान, मोर्चाच्या नियोजनासाठी झालेल्या बैठकीला आमदार उत्तम जानकर आणि आमदार नारायण पाटील अनुपस्थित होते. त्यामुळे त्यांच्या अनुपस्थितीची चर्चा झाली.
याच काळात मुख्यमंत्री देवेंद्र फडणवीस यांनी राज्यातील दुष्काळग्रस्त भागांचा दौरा सुरू केला होता. धाराशिव, लातूर आणि वाशिम या भागांमध्ये पाहणी करत त्यांनी शेतकऱ्यांशी संवाद साधला आणि सरकार मदतीसाठी पावले उचलत असल्याचे सांगितले. तसेच दुष्काळाबाबतचा शासन निर्णय शनिवारपर्यंत काढण्यात येईल, असे मुख्यमंत्री म्हणाले होते.
