पुणे | २३ सप्टेंबर २०२६ : गणेशोत्सवानिमित्त पुण्यातील आंबेगाव परिसरात उभारण्यात आलेल्या ‘अजित सृष्टी’ या देखाव्याला राष्ट्रवादी काँग्रेसचे युवा नेते जय पवार यांनी भेट दिली. दिवंगत अजित पवार यांच्या आठवणींना उजाळा देण्यासाठी हा देखावा साकारण्यात आला आहे. देखावा पाहताना पार्श्वभूमीवर अजित पवार यांच्या आवाजातील संवाद ऐकू येताच जय पवार भावुक झाल्याचे पाहायला मिळाले.
‘अजित सृष्टी’ देखाव्याला जय पवारांची भेट
आंबेगाव येथील कार्यकर्ते युवराज बेलदरे यांच्या पुढाकारातून ‘अजित सृष्टी’ हा देखावा उभारण्यात आला आहे. या देखाव्यात अजित पवार यांच्या सार्वजनिक जीवनातील कार्यासोबतच त्यांच्या जीवनातील विविध आठवणी आणि छायाचित्रे मांडण्यात आली आहेत.
कार्यकर्त्यांच्या आग्रहाखातर जय पवार यांनी २२ सप्टेंबर रोजी या देखाव्याला भेट दिली. यावेळी स्थानिक पदाधिकारी, कार्यकर्ते आणि नागरिकही उपस्थित होते.
अजित पवारांचा आवाज ऐकला आणि जय पवार भावुक झाले
जय पवार देखावा पाहत असताना पार्श्वभूमीवर अजित पवार यांच्या आवाजातील जुना संवाद सुरू होता. यामध्ये आईच्या आठवणींचा उल्लेख असलेले शब्द ऐकू आले. “आई अजून रडत असते का? तिला सांगा रडू नको म्हणून…” हा संवाद ऐकताच जय पवार काही क्षण स्तब्ध झाले.
वडिलांचा आवाज कानावर पडताच त्यांच्या डोळ्यांत अश्रू तरळले. त्यांनी डोळे पुसत स्वतःला सावरण्याचा प्रयत्न केला. त्यानंतर भावुक वातावरणात त्यांनी गणपती बाप्पाची आरती केली.
जुन्या आठवणींनी वातावरण भावूक
‘अजित सृष्टी’मध्ये अजित पवार यांचे बालपण, कुटुंब आणि सार्वजनिक जीवनातील विविध प्रसंगांशी संबंधित छायाचित्रे लावण्यात आली आहेत. हा देखावा पाहताना जय पवार यांना वडिलांच्या अनेक आठवणी जाग्या झाल्या.
अजित पवार यांच्या आवाजातील संवाद आणि समोर दिसणाऱ्या आठवणींमुळे जय पवार यांना आपल्या भावना आवरता आल्या नाहीत. या प्रसंगाचा व्हिडीओही समोर आला असून तो समाजमाध्यमांवर चर्चेत आहे.
गणपती बाप्पाची आरती करताना डोळे पाणावले
वडिलांच्या आठवणींनी भावुक झाल्यानंतर जय पवार यांनी डोळे पुसले आणि त्यानंतर गणपती बाप्पाची आरती केली. त्यांच्या या भावनिक प्रसंगामुळे उपस्थित वातावरणही काही काळ गहिवरून गेले.
‘अजित सृष्टी’च्या माध्यमातून अजित पवार यांच्या आठवणी आणि त्यांच्या सार्वजनिक कार्याला उजाळा देण्याचा प्रयत्न करण्यात आला आहे. जय पवार यांच्या भेटीदरम्यान घडलेल्या या भावुक प्रसंगामुळे या देखाव्याची पुन्हा चर्चा सुरू झाली आहे.
