Parbhani : परभणी जिल्ह्यात धक्कादायक घटना घडली आहे. मानवत तालुक्यातील यशवाडी येथील प्रसिद्ध हनुमान मंदिरातील सभा मंडप कोसळून मोठी दुर्घटना घडली आहे. या दुर्घटनेत 5 जणांचा मृत्यू झाला आहे. तर 17 जण जखमी झाले आहे. सभा मंडप कोसळल्याने या मलब्याखाली एकूण 23 जण दबल्याची माहिती मिळत होती. यातील 5 जणांचा मृत्यू झाला असून 1 जण गंभीर आहे. या दुर्घटनेतील जखमींवर उपचार सुरु आहेत.
दरम्यान, प्रशासनाकडून तत्काळ बचावकार्य सुरु करण्यात आली आहे.पालकमंत्री मेघना बोर्डीकर यांनी सर्व यंत्रणा घटनास्थळी पाठवली आहे. आज शनिवार असल्याने मोठ्या प्रमाणावर भाविक दर्शनाला येत असतात. अनेक अॅम्ब्युलन्स घटनास्थळी दाखल झाल्या आहेत. जिल्हा प्रशासनाचे अधिकारी, पोलीस घटनास्थळी दाखल झाले आहेत.
जखमींना बाहेर काढण्याचे काम सुरु
मानवत तालुक्यातील यशवाडी येथील प्रसिद्ध हनुमान मंदिरातील सभा मंडप कोसळून मोठी दुर्घटना घडली आहे. सभामंडप कोसळल्याने या मलब्याखाली 30 ते 40 जण अडकले होते. यातील 5 जणांचा मृत्यू झाल्याची माहिती मिळाली आहे. प्रशासनाला माहितची मिळताच बचावकार्य सुरु करण्यात आले आहे. प्रत्येक शनिवारी मोठ्या प्रमाणात या मंदिरात गर्दी होत असते. अशातच आज देखील या मंदिरात मोठी गर्दी झाली होती. अशा वेळीच सभामंडप कोसळल्याची घटना घडली आहे. या घटनेतील जखमींना बाहेर काढण्याचे काम सुरु आहे. या सभामंडपाचे काम सुरु आहे. अशातच ही दुर्घटना घडली आहे.
दगडांचा जॉईंट नीट न झाल्यामुळं हा सभामंडप पडल्याची शक्यता : आमदार राजेश विटेकर
प्रत्येक शनिवारी या हनुमान मंदिरात 25 ते 50 हजार भाविक दर्शनासाठी येतात. या ठिकाणच्या सभामंडपाचे काम जवळपास पूर्णत्वास आले होते. पण दगडाचा जॉईंट नीट न झाल्यामुळं हा सभामंडप पडल्याची शक्यता असावी असी माहिती आमदार राजेश विटेकर यांनी दिली आहे. बचावकार्य सुरु करण्यात आले आहे. जखमींना रुग्णालयात नेण्याचे काम सुरु करण्यात आले आहे. क्रेनच्या सहाय्याने तेथील दगड हटवण्याचे काम सुरु आहे. त्यानंतर याखाली किती भाविक अडकले याची माहिती मिळेत अशी माहिती विटेकर यांनी दिली.
यशवाडी हनुमान मंदिर परिसरातील बचाव कार्य पूर्ण
यशवाडी हनुमान मंदिर परिसरातील बचाव कार्य पूर्ण झाले आहे. मिळालेल्या माहितीनुसार सर्व 32 जणांना बाहेर काढण्यात आले आहे. 32 पैकी 7 जणांचा मृत्यू तर 25 जण गंभीर जखमी झाल्याची माहिती. जिल्हाधिकारी संजय चव्हाण आणि उपविभागीय अधिकारी संगीता चव्हाण तहसीलदार पांडुरंग माचेवाड यांनी दिली. बचावकार्य आपत्ती व्यवस्थापन अधिकारी, अग्निशमन विभाग पाथरी, मानवत सार्वजनिक बांधकाम विभाग, जिल्हा आरोग्य अधिकारी, वैद्यकीय पथक महापालिका परभणी, स्थानिक ग्रामस्थांच्या मदतीने पूर्ण करण्यात आले.
सीसीटीव्ही व्हिडिओ समोर
हनुमान मंदिरात झालेल्या या अपघाताचा सीसीटीव्ही व्हिडिओ समोर आला आहे. यात काही भाविक दर्शन घेताना दिसत आहेत. यावेळी अचानक मंडप कोसळतो आणि ढिगाऱ्याखाली अनेक भाविक गाडले जातात. हा व्हिडिओ पाहून अनेकांच्या अंगावर काटा आला. सध्या घटनास्थळी मदतकार्य सुरू असून मृतांचा आकडा आणखी वाढण्याची भीती व्यक्त केली जात आहे.
पालकमंत्र्यांनी घेतली दखल
दर शनिवारी मोठ्या प्रमाणात भाविक दर्शनासाठी येतात
परभणीच्या मानवत तालुक्यातील यशवाडी हे प्रसिद्ध हनुमान देवस्थान आहे. राज्यभरातून भाविक दर्शनासाठी दर शनिवारी येतात. यशवाडी हनुमान मंदिर परिसरात अनेक विकास कामे सुरू आहेत. मंदिरच्या सभा मंडपाचे काम हे राजस्थानी दगड आणून करण्यात आले होते. त्याचे काम सुरूच होते अनेक ठिकाणी त्याला सपोर्ट लावण्यात आला होता. दुपारी तीन वाजून 2 मिनीटांनी अचानक हा सभा मंडप कोसळला. एकूण 32 जण अडकले गेले होते. यामधील 7 जणांचा मृत्यू झाला आहे. सगळ्यांना बाहेर काढण्या तआलं आहे. जखमींवर उपचार सुरु आहेत. अडीच तासानंतर बचावकार्य पूर्ण झाले.
परभणीच्या यशवाडीतील घटना दुर्दैवी, कुटुंबीयांच्या दु:खात आम्ही सहभागी : मुख्यमंत्री
परभणी जिल्ह्यातील यशवाडी येथे हनुमान मंदिराच्या निर्माणकार्य सुरु असलेल्या छताचा भाग कोसळून झालेल्या दुर्दैवी घटनेत काही भाविकांचा मृत्यू झाला आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबीयांच्या दु:खात आम्ही सहभागी आहोत. या घटनेतील जखमींवर उपचार केले जात आहेत. स्थानिक प्रशासनातील अधिकारी घटनास्थळी असून मदत आणि बचावकार्य सुद्धा वेगाने सुरु आहे.
