सोलापूरचे माजी महापौर महेश कोठे लवकरच बाळासाहेबांची शिवसेना पक्षात अर्थात मुख्यमंत्री शिंदे गटात प्रवेश करणार असल्याची चर्चा रंगली होती. मात्र या चर्चेला कोठे यांनी पूर्णविराम देत आपण राष्ट्रवादीतच राहणार असल्याचे स्पष्ट केले आहे.
मी राष्ट्रवादी पक्ष सोडला, असे मी कधीही जाहीर केलेले नाही. पण, आमदार व्हावेच लागेल असे माझे ठरले आहे. विधानसभेची आगामी निवडणूक मी सोलापूर शहर उत्तरमधून लढणार आहे, त्यामुळे जो पक्ष आम्हाला आमदारकीचे तिकीट देईल. त्या पक्षात राहण्याचा माझा प्रयत्न असणार आहे, असे स्पष्टीकरण कोठे यांनी शिंदे गटातील प्रवेशाबाबत दिले.
कोठे म्हणाले, माझी मागणी आमदारकीची आहे. पण, महेश कोठे आमदार कसे होणार नाहीत, यासाठी सगळ्याच लोकांनी आतापर्यंत प्रयत्न केले आहेत. पण आमदारकी घ्यायचीच, असे आम्ही ठरवले आहे आणि आमदार काय काम करू शकतो, हे सोलापूरला दाखवायचे आहे.
