सांगोला-मिरज रेल्वे रोडवरील बोगदा (गेट क्र. 33) पुन्हा सुरु झाल्यामुळे नागरिकांना मोठा दिलासा मिळाला आहे.
सांगोला : सांगोला-मिरज रेल्वे रोडवरील वाहतूक सुरळीत ठेवण्यासाठी करण्यात आलेल्या कामांनंतर बोगदा (गेट क्र. 33) पुन्हा वाहतुकीसाठी खुला करण्यात आला असल्याची माहिती मुख्याधिकारी डॉ.सुधीर गवळी यांनी दिली. बोगदा पुन्हा सुरु झाल्यामुळे नागरिकांना मोठा दिलासा मिळाला आहे.
नगरपरिषद प्रशासनाने दिलेल्या माहितीनुसार, सांगोला-मिरज रेल्वे रोडवरील बोगदा (गेट क्र. 33) येथे रस्त्याची दुरुस्ती, भिंतीचे मजबुतीकरण तसेच वॉटर ट्रीटमेंटसंबंधित कामे हाती घेण्यात आली होती.
या कामांसाठी दिनांक 10 जानेवारी 2026 ते 10 मार्च 2026 या कालावधीत हा मार्ग पूर्णतः बंद ठेवण्यात आला होता. या कालावधीत वाहतूक पर्यायी मार्गांवरून वळविण्यात आली होती, ज्यामुळे वाहनधारकांना काही प्रमाणात अडचणींचा सामना करावा लागला.
दरम्यान, कामे वेळेत पूर्ण करण्यासाठी संबंधित विभागाकडून विशेष प्रयत्न करण्यात आले. रस्ता व बोगद्याच्या सुरक्षिततेस प्राधान्य देत आवश्यक ती सर्व दुरुस्ती व सुधारणा करण्यात आल्या. त्यामुळे आता हा मार्ग अधिक सुरक्षित आणि सुकर झाल्याचे प्रशासनाने स्पष्ट केले आहे.
सद्यस्थितीत सर्व कामे पूर्ण झाल्यामुळे बोगदा (गेट क्र. 33) वाहतुकीसाठी खुला करण्यात आला आहे. यामुळे सांगोल्यातून मिरजकडे जाणारी वाहतूक पुन्हा पूर्ववत सुरू झाली असून, वाहनधारकांचा वेळ आणि इंधनाची बचत होणार आहे. तसेच शहरातील वाहतूक कोंडीही कमी होण्यास मदत होणार आहे.
हे ही वाचा –
थंड पाणी प्यावं की नाही ? आरोग्यासाठी ते धोकादायक ठरतं का ?
