Financial Rules Change 1st July 2025 : जुलै महिन्याच्या पहिल्या दिवसापासून देशात अनेक बदल झाले आहेत ज्यांचा परिणाम सर्वसामान्यांच्या खिशावर आणि दैनंदिन जीवनावर होईल. नवीन पॅनसाठी आधार अनिवार्य केले गेले आहे तर, रेल्वे तिकीट बुकिंगचे नियम बदलले आहेत. तर मग आजपासून काय बदल झाले आहेत पाहूयात सविस्तर…
Big Money Rule Changes from July 2025: आज, 1 जुलै 2025 पासून देशात अनेक मोठे बदल लागू होत आहेत, ज्यांचा थेट परिणाम तुमच्या खिशावर, प्रवासावर आणि दैनंदिन जीवनावर होईल. आधार-पॅन लिंकिंगपासून ते रेल्वे तिकीट बुकिंग, क्रेडिट कार्ड नियम आणि बँक शुल्कापर्यंत सर्वत्र नवीन नियमांची चर्चा आहे.
क्रेडिट कार्ड बिल पेमेंट
आरबीआयने क्रेडिट कार्डबाबत एक नवीन नियम लागू केला आहे. आज म्हणजे 1 जुलैपासून सर्व खाजगी आणि सरकारी बँकांचे काही नियम बदलले आहेत. आता सर्व क्रेडिट कार्डधारकांना भारत बिल पेमेंट सिस्टमद्वारे पेमेंट करावे लागेल. यानंतर बिलडेस्क, इन्फिबीम अव्हेन्यू, क्रेडिट आणि फोनपे सारख्या प्लॅटफॉर्मवर परिणाम होईल.
नवीन पॅन कार्डसाठी नियम
आजपासून आता नवीन पॅन कार्डसाठी अर्ज करायचा असेल तर आधार कार्ड सादर करणे अनिवार्य आहे. याआधी पॅन कार्डसाठी कोणताही जन्म दाखला किंवा कोणताही वैध कागदपत्र पुरेसे होते पण, आता सीबीडीटीने आधार पडताळणी अनिवार्य केली आहे.
व्यावसायिक सिलिंडरच्या किमतीत कपात
व्यावसायिक सिलिंडर आजपासून स्वस्त झाला आहे. IOCL च्या माहितीनुसार मुंबईत व्यावसायिक वापरासाठी असलेला 19 किलोचा सिलिंडर 58 रुपयांनी स्वस्त झाला आहे.अशाप्रकारे सलग चौथ्या महिन्यात व्यावसायिक सिलिंडरच्या किमतीत कपात झाली आहे.
UPI नियम
आजपासून UPI चार्जबॅकचा हा नवीन नियम देखील लागू झाला आहे. आतापर्यंत नाकारलेल्या चार्जबॅक क्लेमची पुन्हा प्रक्रिया करण्यासाठी बँकांना NPCI कडून मान्यता घ्यावी लागत होती पण आता बँका NPCI च्या मंजुरीशिवाय चार्जबॅक क्लेमची पुन्हा प्रक्रिया करू शकतील.
रेल्वेचे रिझर्वेशन चार्ट
आतापर्यंत रेल्वे सुटण्याच्या फक्त चार तास आधी आरक्षण चार्ट जारी केला जायचा पण, आता भारतीय रेल्वेने हा नियम बदलला आहे. आता 1 जुलैपासून आरक्षण चार्ट आठ तास आधीच तयार केला जाईल म्हणजे तुमची ट्रेन दुपारी 1 वाजता सुटणार असेल तर, आदल्या सकाळी 8 वाजता तयार केला जाईल आणि जारी केला जाईल.
जीएसटी रिटर्न
आता GSTN म्हणजेच जीएसटी नेटवर्कने जाहीर केले आहे की GSTR-3B फॉर्म एडिट करता येणार नाही. याशिवाय कोणताही करदाता तीन वर्षांनंतर मागील तारखेचा GST रिटर्न भरू शकणार नाही.
आयकर रिटर्न भरायला मुदतवाढ
सीबीडीटीने आयकर रिटर्न (आयटीआर) भरण्याची शेवटची तारीख 31 जुलैवरून 15 सप्टेंबरपर्यंत वाढवली आहे. म्हणजे, नोकरदारांना आता 46 दिवसांचा अतिरिक्त वेळ मिळेल. मात्र, ITR फायलिंगसाठी तुमच्याकडे कागदपत्रे तयार असतील तर, तुम्ही लवकर रिटर्न भरून शेवटच्या क्षणी तांत्रिक अडचणी टाळू शकता.
रेल्वेमध्ये तत्काळ बुकिंग आणि तिकिटांच्या किमतीत बदल
रेल्वेने प्रवाशांसाठी नवीन नियम देखील लागू केले आहेत. आता तत्काळ तिकिटे बुक करण्यासाठी आधार पडताळणी आवश्यक असेल. तसेच, 15 जुलैपासून तिकीट बुकिंगसाठी (ऑनलाइन किंवा ऑफलाइन) द्वि-घटक प्रमाणीकरण लागू केले जाईल, ज्यामध्ये तुमच्या नोंदणीकृत मोबाइल नंबरवर ओटीपी येईल. याशिवाय, रेल्वे तिकिटांच्या किमतीत थोडीशी वाढ होणार आहे. नॉन-एसी कोचसाठी प्रति किलोमीटर 1 पैसे आणि AC कोचसाठी प्रति किलोमीटर 2 पैसे वाढ होईल.
