२०२६ च्या इंडियन प्रीमियर लीगमध्ये पंजाब किंग्सची विजयी मालिका संपुष्टात. मात्र दोन सामने गमावूनही, संघ गुणतालिकेत पहिल्या स्थानावर कायम आहे. MI मात्र प्लेऑफच्या रेसमधून बाहेर गेली आहे
रविवारी, स्टार सलामीवीर साई सुदर्शनच्या ५७ धावांच्या खेळीच्या आणि भेदक गोलंदाजांच्या त्रिकुटाच्या जोरावर गुजरात टायटन्सने पंजाब किंग्सचा पराभव केला. मोहम्मद सिराज, जेसन होल्डर आणि कागिसो रबाडा यांच्या भेदक गोलंदाजीमुळे टायटन्सने पंजाबला १६३ धावांवर रोखले. सुदर्शनने पुन्हा एकदा दमदार खेळी करून संघाला विजयी लक्ष्य गाठण्यास मदत केली. पदार्पण करणाऱ्या सूर्यांश शेडगेनेही ५७ धावा केल्या. पराभव होऊनही, पंजाब गुणतालिकेत पहिल्या स्थानावर कायम आहे.
पंजाबचा पराभव आणि गुजरातचा विजय होऊनही इंडियन प्रीमियर लीग २०२६ ची गुणतालिका अपरिवर्तित राहिली आहे. श्रेयस अय्यरचा संघ पंजाब अव्वल स्थानी कायम आहे. गुजरात टायटन्स गुणतालिकेत पाचव्या स्थानावर कायम आहे. या विजयानंतर, शुभमन गिलच्या संघाकडे आता १२ गुण झाले आहेत, तर पंजाब किंग्स १३ गुणांवर आहे. यामुळे गुजरात टायटन्सची प्लेऑफमध्ये जाण्याची संधी वाढली आहे. कसा आहे आता गुणतालिका चार्ट
गुणतालिकेत कोणताही बदल नाही
टाईम टेबल पॉईंट्स (फोटो सौजन्य – सोशल मीडिया)
सध्या, पंजाबने खेळलेल्या ९ सामन्यांमधून १३ गुण मिळवले आहेत, ज्यात ६ विजय, २ पराभव आणि एक बरोबरी आहे. रॉयल चॅलेंजर्स बंगळूर, पंजाबइतकेच सामने खेळून, ६ विजय आणि ३ पराभवांसह १२ गुणांसह दुसऱ्या स्थानावर आहे. सनरायझर्स हैदराबादने १० सामने खेळले असून, त्यात ६ विजय आणि ४ पराभव आहेत. या संघाचेही १२ गुण आहेत. राजस्थान रॉयल्स आणि गुजरातने हैदराबादइतकेच सामने खेळले आणि जिंकले आहेत. नेट रन रेटनुसार, ते सध्या अनुक्रमे चौथ्या आणि पाचव्या क्रमांकावर आहेत. यामुळे आता कोणता संघ पहिल्या चारमध्ये येणार हे पाहणं उत्सुकतेचे ठरणार आहे.
कशी आहे स्थिती
चेन्नई सुपर किंग्स आणि दिल्ली कॅपिटल्सने ९ सामने खेळून ४ विजय मिळवले असून, प्रत्येकी ८ गुण आहेत. गुणतालिकेत चेन्नई सहाव्या आणि दिल्ली सातव्या स्थानावर आहे. कोलकाता नाइट रायडर्सने ९ पैकी ३ सामने जिंकले असून ते आठव्या स्थानावर आहेत. मुंबई ९ सामन्यांनंतर केवळ २ विजयांसह नवव्या स्थानावर आहे. सर्वात तळाशी लखनौ सुपर जायंट्स आहे, ज्याने आतापर्यंत ८ सामने खेळून फक्त २ सामने जिंकले आहेत.
