समृद्धी महामार्गावर सतत भीषण अपघात होत असल्याचे ऐकायला मिळते. आज पहाटे एका खासगी बसचा देखील अपघात झाला आहे. या अपघातामध्ये एका दीड वर्षांच्या चिमुकल्याचा जीव गेला आहे.
समृद्धी महामार्गावर एका खाजगी लक्झरी बसचा आज, 19 एप्रिल रोजी सकाळी भीषण अपघात झाला. चालक आणि क्लिनर मोबाईलवर रील बनवण्यात व्यस्त असल्याने बसवरील नियंत्रण सुटले आणि बस थेट पलटी झाली. या अपघातात दीड वर्षांच्या एका चिमुकल्याचा मृत्यू झाला, तर २० ते २५ प्रवासी जखमी झाले.
मुंबहून पुसदकडे निघाली होती बस
अपघाताची घटना मेहकर येथील टोलनाका जवळ घडली. मुंबईहून पुसदकडे निघालेली ही खाजगी ट्रॅव्हल्स बस भरधाव वेगाने जात होती. चालक आणि क्लिनर दोघेही मोबाईलवर व्हिडीओ रील बनवत असल्याचे सांगितले जात आहे. याच नादात बसचे नियंत्रण सुटले आणि ती रस्त्यावर पलटी झाली. बस अचानक पलटी झालेल्या मागून येणारी एक चारचाकी वाहन देखील बस येऊन धडकले. यामुळे चारचाकी वाहनाचे मोठे नुकसान झाले.
दीड वर्षांच्या चिमुकल्याचा जीव गेला
अपघात झाल्याचे कळताच गावकऱ्यांनी घटनास्थळी धाव घेतली. त्यांनी बसमधून नागरिकांना बाहेर काढले. अपघातानंतर परिसरातील नागरिकांनी तात्काळ मदत केली आणि जखमी प्रवाशांना जवळच्या रुग्णालयात हलविले. मात्र, मेहकरच्या ग्रामीण रुग्णालयात डॉक्टर उपलब्ध नसल्याने अनेक जखमींना खाजगी रुग्णालयात दाखल करण्यात आले. काही जखमींवर स्थानिक नागरिकांनी स्वतः थातूरमातूर उपचार केल्याची माहिती आहे. दुर्दैवाने या अपघातात एका दीड वर्षाच्या मुलाचा जागीच मृत्यू झाला.
समृद्धी महामार्गावर वेगवान वाहतुकीमुळे अपघाताचे प्रमाण वाढले आहे. यापूर्वीही अनेक भीषण अपघात घडले आहेत. वाहन चालकांनी मोबाईल वापरताना अतिशय काळजी घेणे गरजेचे असल्याचे तज्ज्ञ सांगतात. प्रशासनाने अपघाताची चौकशी सुरू केली असून, दोषींवर कायदेशीर कारवाई होणार असल्याची माहिती समोर आली आहे. जखमींना उत्तम उपचार मिळावेत यासाठी प्रयत्न सुरू आहेत. ही घटना पुन्हा एकदा ड्रायव्हिंग करताना मोबाईल वापर न करण्याचे महत्त्व अधोरेखित करते.
